MINISTRU JUSTISA PARTISIPA IHA SERIMÓNIA ENTREGA SERTIFIKADU BA FORMADU KRIMI FALSIFIKASAUN DOKUMENTUS

DILI, PSIK – Sexta-Feira, loron 22 fulan-Janeiru 2016, S.E. Ministru Justisa Ivo Valente Partisipa iha serimónia entrega sertifikadu ba formadu sira hamutuk nain 38 ne’ebé mak remata ona formasaun kona-ba Krimi Falsifikasaun Dokumentus iha Polísia Sientifíku Investigasaun Kriminál (PSIK), Dili.

Formasaun kona-ba krimi falsifikasaun dokumentus hala’o hosi Polísia Judisiáriu Portugál nian ba iha Majistradu sira, investigadór no espesialista PSIK nian, auditór Tribunal das Contas, funsionáriu Diresaun Rejistu Notariádu no Terras Propriedades.

Ministru Ivo iha ninia intervensaun hateten, “ohin passu importante ba Timor-Leste, tanba Timor-oan iha ona rekursu própriu hodi hasoru falsifikadór sira, agora ita iha ona ema tékniku no hahu dadaun hodi luta hasoru krimi falsifikasaun dokumentus iha ita-nia rai.”

“Preokupasaun bót tebes iha ita-nia sosiedade, públiku kestiona, sosiedade sívil no jornalista sira husu tuir-tuir; ohin, ha’u satisfaz ho formadu ne’ebé ita iha dadaun ne’e, ita sei esforsu maka’as pelumenus sei reduz falsifikasaun ne’ebé akontese iha ita-nia rai,” dehan Ministru Justisa.

Hodi remata ninia intervensaun, Ministru Justisa apela ba formadu sira katak, hanesan investigadór no auditór tenke kontinua tuir formasaun beibeik hodi aprende nafatin, tanba falsifikasaun nia natureza depende ba ema-nia kapasidade domina dezenvolvimentu téknolojia no informasaun, investigadór sira tenke iha kapasidade bót liu falsifikadór sira hodi nune’e bele impoin sira-nia asaun ba falsifikasaun dokumentus.

“Estadu, Governu sei halo esforsu hotu-hotu hasoru falsifikadór ne’ebé bele komete hosi Timor-oan rasik ka ema estranjeiru, nune’e ita-nia rekursu mós tenke abranje to’o iha munisípiu sira, laós iha Dili de’it maibé tenke to’o iha Baucau, Suai, Oe-Cusse no fatin seluk-seluk tán,” hákotu Ministru Ivo.

Iha Okaziaun ne’e, Diretór Nasionál PSIK, Dr. Vicente Fernandes e Brito hato’o mós ninia diskursu katak, “formasaun ida ne’e sei haforsa liután PSIK nia papel iha sosiedade nia le’et, tanba tuir lei, PSIK nia kompeténsia halo investigasaun ba krimi falsifikasaun dokumentus, droga, brankeamentu kapitál no fraude fiskál, tráfiku umanu no seluk-seluk tán.”

“Tanba-ne’e, ijiji duni PSIK ne’ebé iha ierarkia Ministériu Justisa nian mahon atu iha koñesimentu no kompetensia adekuadu ba asuntu falsifikasaun dokumentus nian,” dehan Diretór PSIK.

Marka prezensa iha serimónia ne’e mak; Juiza Konseleira Dra. Maria Natercia, Embaixadór Portugál, Komisáriu KAK Dr. Aderito Tilman, Defensór-Públiku Jerál Dr. Sergio de Jesus Hornai, Diretór PSIK Dr. Vicente Fernandes e Brito, Diretora DNRN Dra. Maria do Rosario Fatima C. de Araújo, Komandante Departementu Justisa Superintendente Xéfi Carlos Jeronimo, Xéfi Gabinete Ministru Justisa Dr. Evangelino Belo, Komisaun Europeia iha Timor-Leste, formadór sira hosi Polísia Judisiáriu, majistradu sira, formadu no konvidadu sira hosi váriu instituisaun.

Maria de Lourdes Xavier Lin
Media Officer
Gabinete Ministru Justisa,