DILI, CFJ – Ministru Justisa Ivo Valente hamutuk ho Sekretáriu Estadu Konsellu Ministru Avelino Maria Coelho da Silva asina protókolu kooperasaun ho Camões – Instituto da Cooperação e da Língua, I.P. ne’ebé reprezenta hosi Embaixadór Portugál Manuel de Jesus Gonçalves iha Centro Formação Jurídica (CFJ), Kaikoli iha Dili, loron Kinta-Feira (28/1).

Protókolu kooperasaun ida ne’e hodi halo ezekusaun ba Projetu Nasionál Timor-Leste nian iha ámbitu atividade apoiu ba melhoramentu kualidade no proximidade servisu públiku ba Paíz Africanos Língua Ofisiál Portugés (PALOP) no ba Timor-Leste.

Ministru Ivo iha ninia diskursu hateten, “kooperasaun ho Camões – Instituto da Cooperação e da Língua nia objetivu mak atu melhora servisu públiku para acessível liu ba sidadaun sira no ba ita-nia empreza sira, hodi moderniza administrasaun públika atravéz hosi fornesimentu informasaun públiku no E-Government ka governasaun eletrónika.”

“Planu Estratéjiku Setór Justisa tinan 2011-2030 posibiliza iha dentru períodu ne’e servisu setór justisa progresivamente tenke deskonsentradu, aliénde fornese atendimentu bázika ne’ebé besik liu ba sidadaun sira iha nasionál no munisípiu sira hodi hetan bilhete identidade, tanba bilhete identidade nu’udar prova nasionalidade no identidade sívil ne’ebé haktuir iha termu Rejime Jurídiku Identifikasaun Sívil,” esplika Ministru Justisa.

Iha okaziaun ne’e, Ministru Justisa mós partilha informasaun katak protókolu kooperasaun ho Camóes sei hádalan apoiu ba reforsa servisu justisa nian iha munisípiu sira, tamba-ne’e, Ministériu Justisa sei koloka majistradu, prokuradór no defensór públiku sira ba iha territóriu tomak.

“Aktividade ne’ebé konta ba sistema Projetu Nasional Melhoramentu Kualidade Servisu Públiku, ita sei háluan tán produsaun bilhete identidade iha Munisípiu hotu-hotu. Protókolu ne’e sei posibiliza implementasaun produsaun bilhete identidade ba iha Munisípiu Aileu, Ainaro, Liquisa, Manatuto, Manufahi no Viqueque; nune’e sei kobre territóriu nasionál laran tomak,” háktuir tán Ministru Ivo Valente.

Iha sorin seluk, Embaixadór Portugál Manuel de Jesus Gonçalves hateten, “kooperasaun Portugál finansiadu hosi Fundo Europeia hamutuk £400,000 liu hosi Instituto Camões atu moderniza servisu públiku iha Timor-Leste, sei fó apoiu governasaun eletrónika no sei fasilita servisu atendimentu públiku ba emisaun bilhete identidade, aliénde ne’e sei fornese mós kapasitasaun ba Diresaun Rejistu Notariadu.”

Protókolu kooperasaun Ministériu Justisa no Camões ne’e finansia hosi Fundo Europeu de Desenvolvimento (FED), atravéz nomeasaun ba modalidade ba kooperasaun delegada ne’ebé nia jestaun desentralizada hosi Instituisaun Kooperasaun Estadu-Membru, hanesan mós Camões – Instituto da Cooperação e da Língua, I.P. hosi Portugál.

Marka prezensa iha serimónia asina protókolu ne’e mak Embaixadór Portugál, Embaixadora Delegasaun Uniaun Europeia iha Dili, Adjunta Ordenador Nasionál Ministériu Negósiu Estranjeiru no Kooperasaun, Diretór-Jeral Ministériu Justisa, Inspetór-Jerál, Xéfe Gabinete Ministru Justisa, Diretór-Jerál Presidénsia Konsellu Ministru, Doretora Centro Formação Jurídica, Diretora DNRN no Diretór Nasionál sira no funsionáriu Ministériu Justisa no ajente ofisiais sira hosi Sekretáriu Estadu Konsellu Ministru.

Maria de Lourdes Xavier Lin
Media Officer
Gabinete Ministru Justisa