DILI, CFJ – S.E. Ministru Justisa Ivo Valente hala’o tomada de posse ba direjente ofisiais Ministériu Justisa hamutuk ema nain sanulu resin-tolu ne’ebé kompostu hosi kargu diresaun no kargu xéfia sira iha Sala Konferénsia Centro Formação Jurídica (CFJ) iha Dili, loron Tersa-Feira (02/02).

Hamutuk diresaun-tolu mak simu-posse ba kargu foun mak hanesan; Diretór ba Diresaun Nasionál Direitus Umanus no Sidadania (DNDHC) assume hosi Flaviano Moniz Leão, Diretór Nasionál ba Diresaun Nasionál Rejistu Notariadu mak Vitór Neto no Diretora Konservatória no Rejistu Notariadu Munisípiu Dili assume hosi Rosinha da Conceição. Aliénde ne’e, kargu hamutuk nain-sía mak hetan extensaun tinan-rua mak hanesan; Diretór-Jerál Henrique de Oliveira Ximenes, Inspetór-Jerál Lucas António da Costa, Diretór Diresaun Nasionál Administrasaun Finansas (DNAF) Crisógno da Costa Neto no kargu xéfia balun tán no Sub-Inspetór António Fátima de Jesus extende ba tinan-ida.

Serimónia tomada de posse ne’e akompañadu hosi Komisária Komisaun Funsaun Públika (KFP) Dra. Olandina Caero, Ministru Estadu, Koordenádór Asuntu Administrasaun Estadu no Justisa (MECAAEJ) Dionísio Babo Soares, P.hD. no Sekretáriu Estadu Terras Propriedades, Eng. Jaime Xavier Lopes.

Ministru Justisa, Ivo Valente iha ninia diskursu hateten, “serimónia tomada de posse ba direjente ofisiais sira ohin, fulan-fevereiru tinan 2016 ne’e, bazeia ba dinamika no nesesidade instituisaun nian ho objetivu atu aselera ezekusaun servisu sira no responde difikuldade sira ne’ebé Ministériu Justisa infrenta, liu-liu oinsá mak ezekuta no implementa servisu no buka atu promove di’ak liután servisu públiku ba povu tomak.”

“Barometru prinsipál hodi determina pozisaun ka kargu ruma ba funsionáriu sira mak kompeténsia no méritu, dedikasaun, komitmentu, lealdade no responsabilidade ba Estadu no ba ita-nia sosiedade tomak. Ne’eduni, ha’u husu ba ita-bót sira ne’ebé simu tomada de posse ohin atu uza imi nia kapasidade tékniku no kompeténsia tomak hodi halo planu programa no hasa’e kualidade no prestasaun servisu ida tuir estandarte atendimentu mínimu nian no buka atu kontinua halo avaliasaun nafatin ba knár no responsabilidade hotu ne’ebé tula dadaun hela ba ita bo’ot sira-nia kaba’as,” apela Ministru Ivo.

Iha okaziaun ne’e, Ministru Ivo kongratula empossadu sira ho ninia família sira, nia mós fó-nia apresiasaun ba liderança sesante sira ne’ebé mak durante ne’e servisu maka’as nune’e fó ona kréditu di’ak ba dezenvolvimentu instituisaun Ministériu Justisa nian.

“Ha’u fó ha’u-nia apresiasaun ás ba família empossadu sira hotu no funsionáriu tomak, imi foti ona parte ba dezenvolvimentu setór justisa, kontribui nafatin ba Ministériu Justisa hodi atinzi metas ne’ebé planeia tiha ona. Tanba-ne’e, ha’u husu nafatin imi-nia apoiu morál no kbi’it ba sira ne’ebé ohin simu ona tomada de posse, família tenke enkoraja sira nafatin atu sira bele lori kna’ar ho responsabilidade hodi servi di’ak liután ita nasaun doben Timor-Leste,” Apela Ministru Justisa.

Iha sorin seluk Komisária KFP Dra. Olandina Caero hateten, “nomeasaun no selesaun ba ofisiais Menistériu Justisa reflete selecção por mérito, ita-bót sira iha duni kompetensia hodi assume kargu hirak ne’e. Tanba-ne’e, uza ita-bót sira nia kompetensia didi’ak hodi ajuda ita-nia povu.”

“Kompeténsia depende ba rekursu umanus, nune’e formasaun ba funsionáriu Ministériu Justisa tenke kontinua hodi prepara rekursu umanus tuir lei haruka. Hanesan Governu, labele atu husu de’it funsionáriu públiku nia deveres, maibé tenke hákonu mós direitu funsionáriu sira atu hetan formasaun 40 horas kada tinan-tinan,” dehan Komisária Olandina.

Marka prezensa iha tomada de posse mak Prokuradór-Jerál Dr. José Ximenes, Komisáriu KAK Dr. Adérito Tilman, Defensór-Públiku Jerál Dr. Sergio de Jesus Hornai, Provedora Direitus Umanus no Justisa Dra. Jesuinha Gomes, Inspetór-Jerál Estadu Dr. Francisco de Carvalho, Komandante Departementu Justisa Superintendente Xéfi Carlos Jeronimo, Padre Noe Martins, diretores konservatóriu munisípiu sira, diretores nasionais iha ámbitu Ministériu Justisa, parseiru nasionál no internasionál, assessores no família empossadu sira.

Maria de Lourdes Xavier Lin
Media Officer
Gabinete Ministru Justisa