REUNIAUN MINISTRU JUSTISA HO DIREJENTE OFISIAIS MINISTÉRIU JUSTISA

DILI, MJ – S.E. Ministru Justisa Ivo Valente hala’o reuniaun ho direjente ofisiais Ministériu Justisa tomak hodi diskute kona-ba regras foun ba ezekusaun Orsamentu Jerál Estadu tinan 2016 iha Sala Reuniaun Ministériu Justisa iha Dili, loron Sexta-Feira (05/02).

Reuniaun ne’ebé partisipa Diretór-Jerál Ministériu Justisa, Inspetór-Jerál, Direitór Nasionál no Xéfi Departementu sira ne’e aliénde rona orientasaun hosi Ministru Justisa, hanesan meius atu partiha mós informasaun ba direjente ofisiais sira-hotu kona-ba regras foun ezekusaun orsamentu ba tinan 2016, hodi nune’e hare’e hikas aktualizasaun ba planu aprovizionamentu nian.

Ministru Justisa iha abertura reuniaun hateten, “agora ita iha regras foun ezekusaun orsamentu no redusaun orsamentu Ministériu Justisa nian, tanba-ne’e, ha’u husu ba Diretór Nasionais no Xéfi Departementu sira atu aktualiza Planu Asaun Anuál (PAA), halo revizaun no ajusta ita-nia planu no orsamentu nian. Ha’u hatene, ita-nia planu tinan 2016 ne’e mesak prioridade hotu maibé ita-bót sira tenke eskoila prioridade sira ne’ebé mak maiz prioridade iha tinan ida ne’e, katak ita tenke aktualiza prioridade das prioridades.”

“Regras foun ne’e kesi ho rigorozu tanba prosesu hotu-hotu tenke liu hosi aprovizionamentu, laiha kazu urjénti, prosesu pagamentu tenke liu aprovizionamentu ne’ebé haktuir ona iha Decreto do Governo kona-ba Ezekusaun Orsamentu Jerál Estadu ba tinan 2016,” esplika Ministru Ivo.

Iha okaziaun ne’e, Diretór-Jerál Henrique de Oliveira Ximenes informa katak, diskusaun no ajustamentu final ba Planu Asaun Anuál presiza hala’o ho maratona tanba ita tenke remata antes loron 12 fulan-Fevereiru, hodi nune’e bele hahu ona prosesu ezekusaun programa no orsamentu Ministériu Justisa nian ba tinan sívil 2016.

Prosesu diskusaun la'o di’ak tebes hafoin Diretór Diresaun Nasionál Administrasaun no Finansas (DNAF) Crisogno Neto halo aprezentasaun ba Decrito-Governo sobre Execução Orçamento, no kontinua hetan intervensaun no mós apresiasaun hosi direjente diresões sira.

Maria de Lourdes Xavier Lin
Media Officer
Gabinete Ministru Justisa