DILI, MNEK – S.E. Ministru Justisa Ivo Valente hato’o nia diskursu iha Semináriu kona-ba Kontrollu Finansiamentu Públiku hosi Câmara de Contas iha Salaun Nobre Ministériu Negósiu Estranjeiru no Kooperasaun (MNEK) iha Dili, loron Sexta-Feira (05/02).

Semináriu ne’e nu’udar realizasaun hosi kooperasaun Governu Timor-Leste ho União Europeia iha Portugál no Camões I.P. iha ámbitu Programa Justisa durante loron-lima (5) ne’ebé hahu hosi loron 01 – 05 Fevereiru 2016.

Iha ninia diskursu, Ministru Justisa hateten, “Kriasaun Câmara de Contas iha tinan 2011 marka ona fundamentu importante ba iha reforma setór públiku nian hodi tane governasaun di’ak ne’ebé haktuir iha Planu Estratéjiku Dezenvolvimentu 2011-2030, katak presiza iha kondisaun atu fó konfiansa ba Governu hanesan rekizitu afirmasaun nasionál.”

“Nia objetivu prinsipál mak atu asegura transparénsia iha administrasaun públika, tanba-ne’e, kapasidade prestasaun contas nian ba servisu sira iha instituisaun idak-idak tenke sai ona kultura ida ne’ebé rigor ba jestaun finansiamentu públiku nian,” dehan Ministru Ivo.

Iha ninia diskursu kuaze minutu-nen (6), Ministru Justisa Ivo Valente transmiti mós komprimissu Governu nian kona-ba dezenvolvimentu rekursu umanus iha área kontabilidade públiku ba ajente Câmara de Contas.

“Rekursu umanus ba auditór no ajente Câmara de Contas tenke melhora beibeik, atu nune’e progresivamente hasae mós konfiansa hosi ajente ekonómiku sira, instituisaun privada no públika, nasionál no internasionál no sosiedade sivíl ba ita-nia Estadu,” hateten Ministru Ivo.

Marka prezensa iha semináriu ne’e; Ministru Estadu, Koordenádór Asuntu Administrasaun Estadu no Justisa (MECAAEJ) Dionísio Babo Soares, P.hD., Embaixadór Portugál, Embaixadora Delegasaun União Europeia iha Timor-Leste, Juíza Konseleira Dra. Maria Natercia, Membru Parlamentu Nasionál, Komisáriu KAK Dr. Aderito Tilman, Inspetór-Jerál Estadu Dr. Francisco Carvalho, membru Sosiedade Sívil, delegasaun sira hosi Brazil no Cabo-Verde, instituisaun Governu sira, no selu-seluk tán.