SETP-Timor Gap entrega uma 25 ba komunidade Suai

COVALIMA- Sekretáriu Estadu Terras Propriedades (SETP) Jaime Xavier Lopes, iha loron 8 fulan-Fevereiru 2016 foin lalais ne’e hamutuk ho Prezidente Timor Gap Francisco Montero entrega uma ruanulu resinlima ba komunidade afetadu iha Aldeia Lohorai Suku Matai Postu Administrativu Suai Munisipiu Covalima ne’ebé halo hosi kompaña Community Housing Limited.

Seremonia entrega uma ne’ebé maka simbolikamente entrega xave liuhosi SETP ne’e akompana mós hosi Prezidente Timor Gap ho nia tékniku sira inklui mós autoridade lokal munisipiu Covalima nian.

Iha seremonia entrega uma ne’ebé ho nia medida 6x10 metru kuadradu nune’e meos kada uma ida iha rai nia luan 500 metru kuadradu ne’e, SETP husu ba benefisiariu sira tenki koida uma ne’e ho di’ak, tanba uma ne’e enrega ona ba iha komunidade sira.

Iha biban ne’e SETP mós hato’o agradesementu ba iha komunidade sira tanba iha hanoin ne’ebé di’ak hodi dezenvolve nasaun Timór-Leste.

Antes Entrega Xave uma nian ba iha komunidade sira, SETP hateten, ho kontribuisaun komunidade nian ba dezenvolvimentu, maka ikus mai komunidade sira iha ne’e maka hetan ona dezenvolvimentu.

Jaime hateten, dezenvolvimentu ne’ebé iha, ninia benefisiu ba duni komunidade sira, ne’e hanesan pasu di’ak ida ne’ebé hatudu katak, komunidade sira ne’e maka ema patriotizmu no ema ne’ebé iha nasionalizmu ba nasaun TL.

Tuir Jaime, buat ne’ebé maka estadu hanoin, ne’e oinsa maka halo nia komunidade sira bele moris di’ak iha futuru.

“Ita nia heroi sira fó sira nia vida hodi bele hetan ukun-an oinsa ho ita sira ne’ebé maka moris saida maka ita fo ba ita nia nasaun, tanba ne’e tenki fó mós ita nia kontribuisaun ba dezenvolvimentu,” dehan Jaime.

Uma ba benefisiariu sira sei la para ho uma 25 ne’e maibe sei aumenta tan iha etapa daruak nian ho nia total uma 47 maka seidauk halo no agora iha ona prosesu konstrusaun nia laran.

Iha seremonia entrega uma ne’ebé ho nia kuartu tolu, sala ida inklui mós haris fatin no dapur ne’e, nia husu ba komunidade sira ne’ebé maka naran iha ona lista maibe seidauk hetan uma husu atu hein lai to’o konstrusaun remata no sira ne’ebé simu iha etapa dahuluk ne’e tanba sira iha ona dadus.

SETP mos hato’o ninia agradesementu ba komunidade sira tanba sira iha kontribuisaun ne’ebé di’ak ho estadu hodi bele entrega sira nia rai ba estadu hodi bele halo dezenvolvimentu.

Nia husu ba komunidade sira hodi labele fa’an rai, ba ema seluk hodi sosa, tanba bainhira komunidade fa’an rai ba ema seluk ne’e hanesan fa’an jerasaun sira nia futuru, maibé bainhira estadu presiza rai ruma ba dezenvolvimentu hakarak, eh lakohi komunidade tenki entrega, maibé sei fó kompenizasaun tuir lei haruka.

Iha seremonia ne’ebé hahuu ho entrega xave no ko’a pita hosi SETP ho Prezindente Timor Gap ne’e, Jaime husu ba Diretór Terras Propriedade Munisipiu Covalima António Carceres Soares hodi bele haruka Ekipa Sistema Nasionál Cadastro Munisipiu nian hosi bele halo levantamentu dadus ba rai ho uma nian ba benifisiariu sira hodi bele halo sira nia sertifikadu nain ba rai.

Iha fatin hanesan administradór Munisipiu Covalima, Jose Pina Cardoso husu ba Terras Propriedade hodi bele kria sertifikadu rai ho uma nian ba benefisiariu sira, tanba ne’e hanesan ona sira nia privadu entaun sira tenki hetan legalizasaun ruma hosi estadu.

Iha binan ne’e Administradór ne’e husu kontribuisaun komunidade sira hodi hodi labele hosik livre animál hakiak sira hanesan krau no bibi atu labele tama ba airoporto laran, tanba ne’e bele fó peregu ba ema nia vida.

Iha inagurasaun ba uma komunidade afetadu alargamentu airoporto ne’ebé ho nia orsamentu rihun ruanulu resin kada uma ida ne’e, Prezidente Timor Gap, Francisco Monteiro hateten, kolaborasaun komunidade sira nian importante tebes, tanba ne’e hanesan projeitu nasional no husu ba komunidade sira atu bele hatene diadi’ak tanba projetu boot hirak ne’e hanesan projetu nasionál ne’ebé ninia objetivu atu bele fó moris di’ak ba komunidade sira eh hadia komunidade sira moris bele sai ba moris ne’ebé maka di’ak liu.

Agora timor gap komesa ona projetu auto Estrada no sei projetu boot suai supply base, tanba ne’e husu ba komunidade sira atu bele prepara-an hodi bele simu dezenvolvimentu iha munispiu Covalima.

Francisco fiar karak, ho uma hirak ne’ebé maka entrega ba komunidade sira ne’e iha futuru bele muda sira nia moris.*

Ananias Babo Horta
Mídia Officer SETP