MJ hala’o Lansamentu Programa INR iha Ermera no Manufahi

MINISTRA JUSTISA (MJ) Sesta-feira, 20 Maiu 2011, hala’o lansamentu programa halibur dadus rai nian ne’ebé realiza husi programa Ita Nia Rai (INR) iha Distritu Ermera.

Iha lansamentu ne’e, Ministra Justisa Lúcia Maria Brandão Freitas Lobato ba partisipantes sira, hateten katak programa INR ne’ebé ohin hala’o nia lansamentu, tuir lolos antes ne’e hala’o tiha ona, maibe tamba deit programa levantamentu dadus iha Dili kleur liu distritu hotu.

Ministra mos husu ba komunidade Distritu Ermera atu labele laran tristi, tamba tuir Ministra, komunidade sira nebe ikus liu ho programa INR ba foti dadus ne’e mak diak liu tamba ekipa sira mak atu ba foti ne’e iha esperiensia ne’ebé diak liu tan.

Nia mos husu ba komunidade sira atu fo dadus ne’ebé lós ba ikipa sira mak ba halo levantamentu dadus iha sira nia hela fatin, komunidade sira mak hato’o deklarasaun falsu sei hetan sansaun tuir lei ne’ebé iha hodi ba hatan iha Tribunal.

“Hau husu ba komunidade tomak, labele tauk atu hato’o keixa ruma wainhira ekipa sira ba foti ita bo’ot sira nia dadus halo kobransa ruma ba ita boot sira. Hau nia Ministeiru sei nakloke ba ema hotu atu simu keixa sira ne’e,” dehan nia.

Nia mos hateten, Parlamentu Nasional (PN) sente lei ba rai ladun importante ba povu ho ida ne’e sira deskuti deit lei sira seluk, hodi la fo importansia ba lei rai nian, sira buka atu deskuti deit buat ne’ebé furak, maibe assuntu ne’ebé kona kedas ba povu nia susar sira husik hela deit.

Lansamentu nebe’e hala’o iha Distritu Ermera ne’e, tuir Ministra hanesan assuntu ne’ebé importante tebes ba komunidade sira, tamba nudár sidadaun tenki iha netik rai pedasuk ida. Nune’e, rai mos importante tebes ba ema ida-idak nia moris.

“Hau tenta atu Deputadu sira mak iha ne’ebá tenki buka atu deskute lalais. Sira dehan atu hadia povu nia vida, maibe ida ne’ebé atu hadia povu nia moris lor-loron nian hodi garante povu nia direitu ne’e mak tinan ida resin ona mos sira la fo importansia e dalaruma mos lei ne’e sira hatama hela iha gaveta. Se dehan lei ne’e la diak entaun parlamentu buka atu halo lei seluk,” dehan Ministra ho lian makás.

Hatan ba preokupasaun komunidade nian konabá rai sira nebé Timor-oan nian maibe nain iha estranjeiru, Ministra hateten, wainhira nain hanesan sidadaun estranjeiru sira sei la iha direitu ba rai mak iha TL, e fatin sira ne’e Estadu mak sei administra.

Iha fatin hanesan Diretór ba Projeitu INR, hateten, ema ida-idak presiza fatin ne’ebé hakmatek ba sira nia moris. Ho ida ne’e husu ba lider komunitaria sira atu bele fo sira nia kontribuisaun wainhira ekipa foti dadus sira tama iha sira nia área.

Iha biban ne’e Diretór Nasionál Terras Propriedade Servisu Cadastrais, Jaime Xavier Lopes husu ba komunidade sira atu fo sira nia partisipasaun masimu iha programa levantamentu dadus ba rai ne’e.



Ananias Babo Horta
Media Officer Gabinete Ministra Justisa nian