DÍLI, GMJ – S.E. Ministru Justisa Timor-Leste Ivo Valente halo reuniaun ho membru Komisaun Reforma Lejizlativa no Setór Justisa ne’ebé lídera hosi Dr. Jorge Manuel Ferreira da Graça iha Gabinete Ministru Justisa, loron Kuarta-Feira (27/04/2016).

Iha reuniaun ne’e, Prezidente Komisaun Jorge Manuel Ferreira da Graça informa kona-ba prosesu avaliasaun no progressu servisu Komisaun Reforma Lejizlativa no Setór Justisa nian. Aliénde ne’e, Komisaun entrega mós dokumentu relatóriu inisiál rezultadu avaliasaun no Planu Estratéjiku Reforma Lejizlativa no Setór Justisa nian ba Ministru Justisa.

Ministru Ivo Valente hato’o ninia apresiasaun bót ba servisu Komisaun, no nia sei esforsu atu ajuda, sei istuda no análize dokumentu ne’ebé Komisaun prepara ona.

“Ha’u apresia tebes ho servisu ita-bót sira, tanba iha tempu badak de’it Komisaun konsege produz ona relatóriu ida ne’e. Ha’u sei istuda no análize dokumentu hirak ne’e no sei fó feedback ba ita-bót sira,” hateten Ministru Ivo Valente.

Prezidente Komisaun Jorge iha reuniaun ne’e mós husu ba Señor Ministru Ivo Valente atu halo reuniaun ho membru Konsellu Koordenasaun Justisa, tanba asuntu reforma lejizlasaun no justisa presiza tebes apoiu no involvimentu hosi Tribunál Rekursu no Prokuradór-Repúblika kona-ba prátika justisa iha sosiedade.

“Kona-ba reuniaun ho Konsellu Koordenasaun Justisa, ha’u sei lori proposta ne’e no komunika hikas ba iha Konsellu Koordenasaun hodi nune’e membru sira artikula deskobrimentu ne’ebé Komisaun Reforma aprezenta, nune’e sé posivél bele halo aletrasaun ruma ou la’e,” esplika Ministru Ivo.

Reuniaun ho ámbitu vice-versa ne’e la’o di’ak tebes, membru Komisaun Reforma aprezenta rekomendasaun no rezultadu avaliasaun nian, Ministru Justisa mós partilla informasaun kona-ba esforsu no progressu ne’ebé Ministériu Justisa atinzi dadaun, kooperasaun hikas ho Portugál no planu formasaun komplementáriu ba majistradu judisiál iha inísiu fulan-setembru iha tinan ida ne’e.

Akompaña Ministru Justisa iha reuniaun ne’e mak, Xéfi Gabinete Ministru Justisa Evangelino Belo.