SUAI, MJ – S.E. Ministru Justisa Ivo Valente hala’o inspesaun ba finalizasaun Konstrusaun Estabelesimentu Prizionál Suai, iha Suku Debos Munisípiu Kovalima, loron Sexta-Feira (29/04/2016).

Konstrusaun Estabelesimentu Prizionál Suai halo hosi Kompañia Lokál Mar Vermelho Unipessoal, Lda. ho valór orsamentu hamutuk $1,078,046.64 dolár amerikanos ne’ebé lokalizada iha Suku Debos, Suai Munisípiu Kovalima.

Prizaun Suai kompleta ho Bloku tolu (3) no kada Bloku iha Sela lima (5) ne’ebé ho kada Sela ho kapasidade prizioneiru ema nain ualu (8). Prizaun ne’e sei akumula totál prizionéiru hamutuk ema 120 iha área judisiáriu Munisípiu Kovalima, Manufahi, Ainaro no Bobonaro.

Depois halo inspesaun ba Bloku no sela prizionéiru sira, Aula Sentru Formasaun Vokasionál nian, Kapela Prizaun, dapur, Klinika, fatin Guarda Prizaun, Gardu Siguransa no eletrisidade; Señor Ministru Ivo informa katak, inspesaun ne’e hodi hare’e besik finalizasaun ba Konstrusaun Prizionál Suai tuir relatóriu levantamentu kompañia nian ne’ebé atinzi ona 91%, signifika, hela buat ki’ik balun hodi finaliza ona projetu ida ne’e.

“Ha’u espera iha fulan-Juñu 2016, Prizaun Suai bele funsiona hodi nune’e bele halo ona destakamentu prizionéiru balun hosi Prizaun Díli ne’ebé agora liu ona nia kapasidade,” dehan Ministru Ivo Valente.

Iha sorin seluk, Diretór Diresaun Nasionál Servisu Prizionál no Reinsersaun Sosiál (DNSPRS) Helder Cosme Marçal Belo informa katak,”iha tinan 2017, Ministériu Justisa sei halo rekrutamentu Guarda Prizionéiru hamutuk ema hát-nulu (40) ba Prizaun Suai nian, Termu Referénsia (TOR) haruka ona ba iha Komisaun Funsaun Públika, dadaun ne’e hein de’it desizaun.”

Relasaun ho planu ba oin, Diretór Helder infroma liután, “aliénde halo rekrutamentu Guarda Prizionál, planu ba oin mak sei halo kontrusaun ba moru liur, nu’udar pakóte konstrusaun prizaun hodi kompleta rezidénsia Guarda Prizionéiru sira.”

Akompaña Ministru Justisa iha inspesaun ne’e; Diretór Nasionál DNSPRS Helder Cosme Marçal Belo, Xéfi Departementu Inspesaun no Auditoria DNSPRS Julio Dias Ximenes, Xéfi Gabinete Ministru Justisa Evangelino Belo, Diretores iha ámbitu Ministériu Justisa iha Munisípiu Kovalima no Assessor Komunikasaun Sosiál Gabinete Ministru Justisa Joaozito Viana.