DILI, MJ – S.E. Ministru Justisa Ivo Valente inspetór ba Serimónia Isár Bandeira iha Edifísiu Ministériu Justisa, iha Díli, loron primeiru Segunda-Feira fulan-Maiu (02/05/2016).

Serimónia Isár Bandeira iha loron primeiru Segunda-Feira fulan-Maiu nian responsabiliza hosi Polísia Sientifíka Investigasaun Kriminál (PSIK). Isár Bandeira kada fulan hala’o rotativamente, nune’e diresaun seluk sei hetan oportunidade hanesan iha fulan-fulan tuir mai.

Iha ninia diskursu iha Isár Bandeira ne’e, Ministru Ivo Valente hateten katak, “fulan-Maiu, fulan ne’ebé ijiji ita-hotu atu servisu maka’as liután, besik ona atu ramata ezekusaun programa trimestre dalaruak nian, no povu ijiji ita-nia servisu. Tanba-ne’e, ha’u husu atu ita tenke komprende di’ak idak-idak nia servisu maské ita sei hasoru difikuldade oin-oin, ita-nia servisu agora mak sei determina ita-nia respeita ba ita-nia herói sira ne’ebé sakrifíka nia án ba rai ida ne’e.”

“Hodi dehan mós ba imi-hotu katak, ha’u foin halo viajem ida ba Suai hodi hare’e konstrusaun Prizaun iha ne’ebá, no halo mós vizita ba Defensoria Públiku, Terras no Propriedades no Rejistu Notariadu; sira falta fasilidades, laiha kareta, motor no komputadór, no mós falta rekursu umanus maibé orgullu tanba sira halo servisu di’ak tebes, ne’e ijiji mós ita-hotu iha Díli tenke servisu maka’as,” dehan Ministru Ivo Valente.

Relasaun ho rekursu umanus ne’ebé sei falta, Ministru Justisa fó ezemplu Rejistu Notariadu Munisípiu Kovalima ne’ebé ho funsionáriu nain 5 de’it, maibé iha loron-ida ema nain-ida (1) halo atendimentu Bilhete Identidade loron-loron ba ema kuaze 50.

“Iha Edifísiu Rejistu Notariadu Kovalima hasoru dezafiu tanba falta funsionáriu, funsionáriu hamutuk ema nain lima (5) de’it mak halo atendementu iha Munisípiu Kovalima tomak, maibé iha funsionáriu ida ho idade maiz avansadu ona no halo atendimentu públiku, kada loron ida nia simu ema hamutuk kuaze 50, ha’u hakarak hateten deit katak, mezmu funsionáriu ne’e ho idade maiz avansada, maibé nia sei hatudu vontade servisu maka’as ho di’ak tebes,” hateten Ministru Ivo.

Aliénde ne’e, iha ninia diskursu, Ministru Justisa koalia mós kestaun disiplina tempu, no oinsá mak kuidadu ekipamentu servisu nian, hodi nune’e labele prejudika servisu loron-loron nian.

Isár Bandeira ne’e hetan partisipasaun maximu hosi funsionáriu sira hosi diresaun hotu-hotu, inklui Diretór-Jerál, Inspetór-Jerál, Diretór Nasionál no Xéfi Departementu sira ne’ebé mak foti formatura tuir liña-reta no espasu kapa’as.