DNDHC - Ministériu Justisa liu hosi Diresaun Nasionál Direitus Umanus no Sidadania (DNDHC) servisu hamutuk ho Komisaun Nasional Direitu ba Labarik (KNDL) Sosializa Rekomendasaun Konvensaun Direitu Labarik nian iha Munisípiu Aileu no Manufahi, loron 28-29 fulan Abril 2016.

Xéfi Departementu Tratadus no Monitorização,Sr. Helder Godinho Martins, representa Diretor Diresaun Nasionál Direitus Umanus no Sidadania (DNDHC) iha abertura hateten katak Timor-Leste ratifika ona konvensaun iha 2003 hanesan Estadu parte ba Konvensaun Direitu Labarik iha obrigasaun hato’o relatoriu estadu ba Komité Direitu Labarik iha Jenebra kona ba lala’ok direitu labarik iha rai laran no mos simu rekomendasaun husi Komité Direitu Labarik kona-ba saída de’it mak Timor-Leste tenke kumpri hodi hadía situasaun labarik iha Timor-Leste.

Xefe Departamentu Relasoens Públika no Divulgasaun Sr. Jose Paulino Dias Ximenes hanesan orador dahuluk esplika kona ba prinsipiu jerais Konvensaun Direitu Labarik, objetivu Estadu Timor- leste ratifika konvensaun no papel inan aman profesores no sosiedade atu respeita labarik sira nia direitu tuir regras no prosedimentu konvensaun no lei domestika ne’ebe vigora.

Segundu orador iha sosializasaun ne’e, Xéfi Departementu Tratadus no Monitorização Ministériu Justisa Sr. Helder Godinho Martins, esplika kona-ba prosesu Preparasaun ba relatóriu KDL, estabelesimentu pontu fokál liña-ministeriál no Munisípiu, nomeasaun entitade Estadu nu’udar responsável atu koordena no prepara relatóriu KDL, no kooperasaun entre Komisaun Nasionál Direitu ba Labarik hodi fó apoiu ba DNDHC, diskusaun relatóriu iha Konsellu Ministru, no mós prosesu preparasaun no submisaun relatóriu ba Komité Direitu Labarik iha
Jenebra. Komposisaun Ministeriu xave ba halo apresentasaun no simu rekomendasaun husi Komité Direitu Labarik iha Jenebra

Komisaun Nasionál Direitu Labarik ne’ebe reprezenta hosi Teknika Superior Sra. Madalena Guterres Correia iha oportunidade ida ne’e koalia kona-ba; medidas jerál husi Rekomendasaun ne’ebe rekomenda ba Estadu Timor Leste atu implementa Konvensaun Direitu Labarik,(KDL) nia prinsípiu sira kona-ba direitu sívil, liberdade, fenómenu violénsia hasoru labarik sira, importansia ámbiente família no kuidadadus alternativas.

Sra. Madalena salienta katak, “Timor-Leste iha obrigasaun atu implementa rekomendasaun Konvensaun Nasõens Unidas ba Direitu Labarik hosi Jenebra; importante ba labarik sira mak tenke hetan saúde bazika, edukasaun, bem-estar, tempu hodi goja ka halimar, tuir atividade kulturál no hetan medidas espesiál ba protesaun.”
iha sosializasaun ida ne’e partisipantes sira antusiasmu tebes hodi rona no hato’o sira nia preokupasaun atu asegura no respeita labarik sira nia direitu tuir lei no konvensaun.

Programa Sosializasaun ba Rekomendasaun Konvensaun Direitu Labarik iha Municipu Aileu no Manufali partisipa mos hosi; Administrador Munisipiu no adjuntu Administrador Munisipiu, Conviocsões Relisiosos, Professor sira, PNTL, Estudante Secundario, Sosiedade Sívil, inan-aman, Autoridade Local, Juventude, Animadores Sosiais, Representante Feto no populasaun sira ne’ebe relevantes ba assuntu labarik.