DÍLI, MJ – S.E. Ministru Justisa Ivo Valente aprova ona dezeñu ikus ba passaporte eletrónika (E-Passport) Timor-Leste ne’ebé mak aprezenta hosi Gemalto Company iha Gabinete Ministru Justisa, iha Díli, loron Kuarta-Feira (18/05/2016).

Hafoin aprova dezeñu passaporte eletrónika, Ministru Ivo informa katak, “ohin ha’u aprova ona dezeñu ka modelu passaporte eletrónika ba Timor-Leste nian, depois ida ne’e, kompañia bele halo ona instalasaun ekipamentu, no hahú halo produsaun ba passaporte. No tuir planu, antes remata tinan 2016, Timor-Leste emite ona passaporte eletrónika.”

Iha prosesu aprovasaun dezeñu passaporte eletrónika, foufoun Ministru Justisa verifika layout uzu logo, hare’e mós nia konteúdu no redasaun. Aliénde ne’e, koa’lia mós ba tékniku DNRN atu hare’e hikas passaporte ne’e antes lori ba iha prosesu produsaun.

Tuir dezeñu passaporte, aprova no devide ba tipu regulár/ komun, diplomátiku no passaporte servisu nian.

Bazeia ba kontratu, emisaun passaporte eletrónika hosi Gemalto Company sei hala’o durante iha tinan-tolu (hahú tinan 2017-2019). No Ministériu Justisa mak sei hare’e hikas kontratu tuir avaliasaun dezempeñu nian bainhira atu kompañia remata nia kontratu.

Marka prezensa mós iha reuniaun ne’e mak; Diretór Diresaun Nasionál Rejistu Notariadu (DNRN) Victor da Costa Neto, Xéfi Gabinete Ministru Justisa Evangelino Belo, Diretór Diresaun Nasionál Administrasaun no Finansas (DNAF) Crisogno da Costa, Xéfi Departementu IT DNRN Pinso Seisei Vieira, Xéfi Departementu DNRN Nelson Belo.