MANATUTO, MJ – S.E. Ministru Justisa Ivo Valente ho direjente ofisiais Ministériu Justisa tomak komemora Loron Aniversáriu Restaurasaun Independénsia Repúblika Demokrátiku Timor-Leste (RDTL), ba Dala-14 hamutuk ho povu Munisípiu Manatuto, iha Manatuto Villa, hosi loron 19 to’o 20 Maiu 2016.

Loron Aniversáriu Restaurasaun RDTL ba Dala-14 ne’e nu’udar atividade Estadu nian ne’ebé hala’o simultaneamente iha Munisípiu hotu-hotu. No iha tinan 2016, serimónia Estadu lokalizadu iha Munisípiu Ermera, Gleno no preside rasik hosi S.E. Prezidente Taur Matan Ruak.

Relasaun ho serimónia Estadu ne’e, Ministru Justisa foti kna’ar distintivo pessoal ka inspector ba serimónia Isár Bandeira Nasionál ba Loron Aniversáriu Restaurasaun Independénsia RDTL iha Kampu Administrasaun Munisípiu Manatuto, loron Sexta-Feira (20/05/2016).

Serimónia kuaze oras 2 ne’e, Ministru Ivo Valente le’e diskursu S.E. Prezidente Taur Matan Ruak ba povu tomak, liu-liu ba povu Munisípiu Manatuto.

Iha diskursu ho pájina hamutuk 10 ne’e, Prezidente-Repúblika Taur Matan Ruak husu ba povu tomak atu halo reflesaun klean ba durante independénsia, no ema idak-idak nia partisipasaun iha prosesu konstrusaun nasaun ba mehi moris di’ak, no husu apoiu ba esforsu sira mak Estadu halo dadaun.

Nia (Prezidente) husu mós Timor-oan sira-hotu atu kompremete ho sentiment hasoru violénsia, Timor-oan sira tenke hakribi violénsia iha forma hotu-hotu, pasadu fó ona lisaun barak kona-ba violénsia no iha independénsia Timor-oan idak-idak merese atu hetan páz.

Hafoinisárbandeira, Ministru Ivo tuirtebe-tebeho povuManatuto, depoizne’e, fotohamutuk ho autoridadelokálsira, veteranu no antigoskambantantes, polísia no estudantesira.

Marka prezensa iha Isár bandeira ne’e mak; veteran no antigos kombatentes, funsionáriu públiku, Administradór no Administradór Postu Munisípiu Manatuto, líder komunitáriu sira, profesores, estudante, bombeirus, seguransa sivíl, PNTL, parseiru dezenvolvimentu, direjente Ministériu Justisa, joventude, Igreja, sosiedade sivíl no mídia lokál.

Aliende ne’e, iha loron Kinta-Feira (19/05/2016), Ministru Justisa Ivo Valente tuir misa solene Selebrasaun Aniversáriu Restaurasaun Independénsia RDTL iha Igreja Paroquia Santo Antonio ne’ebé selebrada hosi Amo Paroco Manatuto, Pe.Martinho G. Da Silva Gusmão.

Iha nia homilia, Amo Martinho hateten kona-ba herói nasionál Prezidente Nicolau Lobato ne’ebé hahú hari’i konseitu nasionalismu iha jardim unidade nasionál nian, katak nasionalismu mak nu’udar Estadu nia klamar no fuan.

Tanba-ne’e, hanesan jerasaun foun, no jerasaun agora dadaun ne’e atu hahí unidade hodi fó esperansa ba Timor nia futuru di’ak.

Iha oportunidade ne’e, Ministru Ivo informa katak, “misa eukaristia iha Igreja Paroquia Santo Antonio hanesan pakóte selebrasaun aniversáriu Timor-Leste nian iha Munisípiu Manatuto, no aban (20/05/2016) ha’u sei preside eventu principal serimónia Isár Bandeira 20 Maiu nian ho povu Manatuto tomak.”

Misa solone ne’e partisipa sarani sira iha Munisípiu Manatuto, estudante no direjentes ofisiais Ministériu Justisa ne’ebé akompaña Ministru Justisa ba serimónia Estadu Isár Bandeira 20 Maiu 2016.

Parabéns Timor-oan sira!
Parabéns Povu Munisípiu Manatuto Tomak!
Parabéns Timor-Leste!