DÍLI, GMJ – S.E. Ministru Justisa Ivo Valente sásin ba serimónia asina Kontratu Kooperasaun entre Ministériu Justisa ne’ebé reprezenta hosi Diretór Nasionál Polísia Sientífika Investigasaun Kriminál (PSIK) Dr. Vicente Fernandes e Brito ho Camões – Instituto da Cooperação e da Lingua reprezentadu hosi Señora Prezidente Konsellu Diretivu, Professora Doutora Ana Paula Laborinho iha Gabinete Ministru Justisa, Díli, loron Kurta-Feira (15/06/2016).

Kontratu Kooperasaun ne’e tuir enkuadramentu jurídiku ne’ebé aplika iha Timor-Leste no Portugál, hodi kompremete servisu assessoria no formasaun nian iha abrigu Programa Justisa iha Timor-Leste. Espesialmente, peritu ne’e sei fornese apoiu iha área Forense Laboratóriu Polísia Sientífika, halo akompañamentu kazu prátiku sira investigasaun laboratorial, triajem vestígius no tratamentu informasaun ne’ebé rekoilla, no investigasaun judisiária.

Selebrasaun kontratu ne’e marka mós halo kontratu ba João Manuel Freira Fonseca, peritu forense hosi Portugál hodi apoiu tékniku no formasaun ba Laboratóriu Forense Polísia Sientífika Investigasaun Kriminál (PSIK).

Marka mós prezensa iha asina Kontratu Kooperasaun ne’e mak; Secretário Executivo do FDCH (Fundo de Desenvolvimento do Capital Humano) Sr. Ismenio Martins da Silva no Xéfi Gabinete Ministru Justisa Sr. Evangelino Belo.