MINISTRU IVO VALENTE VIZITA FEIRA FUNSAUN PÚBLIKU IHA SEKRETÁRIU ESTADU JUVENTUDE NO DISPORTU DÍLI

DÍLI, SEJD – S.E. Ministru Justisa Ivo Valente halo vizita traballu ba iha Feira Funsaun Públiku hodi komemora Aniversáriu Funsaun Públiku iha loron 15 Jullu 2016 ne’ebé lokalizadu iha Sekretáriu Estadu Juventude no Disportu (SEJD), Lecidere Díli, loron Tersa-Feira (12/07/2016).

Feira ne’ebé partisipa hosi ministériu sira hotu, inklui instituisaun estadu sira hodi aprezenta rezultadu servisu funsionáriu públiku sira nian.

Ministru Ivo Valente iha nia vizita ne’e hateten, “ha’u nia vizita iha feira ne’e atu manifesta ha’u-nia apoiu ba funsionáriu públiku tomak, aliénde ne’e mós atu kongratula funsionáriu públiku sira ne’ebé servisu maka’as hodi halo atendimentu públiku ba ita-nia povu.”

“Ha’u mós hakarak hato’o ha’u-nia agradesimentu bót no parabéns ba funsionáriu públiku Timor-Leste tomak mak sei komemora Aniversáriu Funsaun Públiku nian iha dia 15 Jullu 2016,” dehan Ministru Ivo Valente.

Durante iha nia vizita, Ministru Ivo Valente halo vizita kada stand de exposição, no ikus liu halo vizita ba stand Ministériu Justisa nian. Ministru Justisa hare’e produto servisu hosi funsionáriu sira, ko’alia ho sira no enkoraza nafatin atu kontinua kreativu, badinas, profesionál no produz buat foun (inovativu).

“Feira ida ne’e di’ak tebes, sei loke espasu barak liután ba funsionáriu públiku idak-idak hodi promove ninia kreatividade no inovasaun iha nia servisu,” dehan Ministru Ivo Valente.

Vizita ba feira ne’e hákotu ho foto hamutuk ho funsionáriu públiku no direjente ofisiál iha ámbitu Ministériu Justisa nian.

Maria de Lourdes Xavier Lin
Media Officer
Gabinete Ministru Justisa