DÍLI, GMJ – S.E. Ministru Justisa Ivo Valente reuniaun ho Embaixadora Timor-Leste ba Singapura Sra. Adaljiza Magno iha Gabinete Ministru Justisa (GMJ), Díli, loron Kuarta-Feira (13/07/2016).

Reuniaun ho Embaixadora Adaljiza Magno ne’e, ko’alia kona-ba kestaun passaporte, no aktualiza informasaun sobre situasaun sidadaun Timor-Leste iha Singapura. Aliénde ne’e mós fahe informasaun ba malu kona-ba progressu dezenvolvimentu passaportes biométricos (E-Passport) ne’ebé mak tuir planu Ministériu Justisa sei emite iha inísiu tinan 2017.

“Progressu dezenvolvimentu passaportes biométricos Timor-Leste, agora iha prosesu finalizasaun dezeñu no mobilizasaun ekipamentu, kompañia internasionál (Gemalto Company) hosi Singapura mak responsabiliza nia produsaun,” informa Ministru Ivo Valente.

Iha biban ne’e, Embaixadora Adaljiza Magno mós dehan katak, “kualidade passaporte, liu-liu passaportes biométricos ho estandarte internasionál mak sei assegura sidadaun Timor-oan sira-nia viajem ba rai liur, no sei hasa’e imajen di’ak ba Timor-Leste iha mundo internasionál.”

Iha oportunidade ida ne’e, Ministru Ivo Valente husu mós apoiu ba Señora Embaixadora Adaljiza Magno atu buka meius ba kapasitasaun funsionáriu Rejistu Notariadu Ministériu Justisa em relasaun ho formasaun kontrollu kualidade passaporte iha Singapura.

Partisipa iha reuniaun ne’e mak, Diretór Diresaun Nasionál Rejistu Notariadu (DNRN) Victor da Costa Neto, Xéfi Departementu IT DNRN Pinso Seisei Vieira, reprezentante imigrasaun Timor-Leste iha Singapura no Assessor Gabinete Ministru Justisa Joaozito Viana.