MINISTRU IVO VALENTE PREZIDE REUNIAUN KONSELLU KONSULTIVU MINISTÉRIU JUSTISA IHA DÍLI

DÍLI, MJ – S.E. Ministru Justisa Ivo Valente prezide reuniaun Konsellu Konsultivu Ministériu Justisa iha Sala Reuniaun Ministériu Justisa, Díli, loron Segunda-Feira (18/07/2016).

Reuniaun regulár Konsellu Konsultivu Ministériu Justisa ne’e diskute kona-ba atribuisaun servisu ne’ebé mak Diresaun Nasionál Rejistu Notariadu (DNRN), no Diresaun Nasionál Terras, Propriedades no Sistema Kadastru ba munisípiu sira hodi responde realizasaun pre-deskonsentrasaun ba Munisípiu Dili, Ermera, Baucau no Bobonaro.

Aliénde ne’e, aktualiza no diskute atividade servisu no ezekusaun orsamentu ne’ebé mak hala’o ona hosi diresaun nasionál sira, Gabinete Diretór-Jerál, Gabinete Inspesaun no Auditoria (GIA), no instituisaun tuteladu hanesan Defensoria Públiku Jerál no Polísia Sientífika Investigasaun Kriminál (PSIK).

Ministru Ivo Valente hahú loke diskusaun ba servisu Rejistu no Notariadu nian ne’ebé mak bele ona delega ba iha Administrasaun Munisípiu hodi hala’o. Nune’e, Diretór DNRN Vitór da Costa Neto halo aprezentasaun ba atividade Rejistu Notariadu nian mak durante ne’e hala’o iha Edifísiu Nasionál, no atividade sira ne’ebé mak bele ona halo atribuisaun ba iha munisípiu sira. Aprezentasaun hirak ne’e diskute ho klean, no halo justifikasaun tanbasá, no oinsá nia implikasaun iha futuru.

Hamutuk atividades 11 hosi DNRN mak bele halo ona iha nível munisípiu, katak, balun sei atribui parsialmente (neneik), balun tán bele atribui tomak ona ba Administrasaun Munisípiu. Atividade hirak ne’e mak hanesan; rejistu arte marciais, rejistu kriminál, rejistu nascimento no obitu, atividade notariál, rejistu partidu polítiku, transkrisaun kazamentu sívil, etc.

Hafoin Konsellu Konsultivu deside atu halo atribuisaun atividade DNRN balun ba munisípiu, Ministru Ivo Valente fó oportunidade ba Diresaun Nasionál Terras no Propreidades atu aprezenta mós nia atividade sira ne’ebé mak bele halo ona atribuisaun ba Administrasaun Munisípiu sira.

Diretór DNTP-SC Romão Guterres aprezenta katak, Terras no Propriedades bele halo ona delegasaun ba munisípiu kona-ba servisu identifikasaun propriedade Estadu nian, bele halo mós notífikasaun ba okupantes rai Estadu, no Administrasaun Munisípiu bele fasilita ona mediasaun no rezolusaun konflitu ba rai no propriedade.

Kestaun seluk, Diretór Romão hatutan katak, sei halo avaliasaun gradualmente, antes entrega atividades ne’ebé bele atribui tán ba Administrasaun Munisípiu hosi hala’o.

Depois-de aprezentasaun hosi DNTP-SC, Ministru Ivo Valente kontinua fó oportunidade ba diresaun idak-idak atu aprezenta progressu implementasaun atividade sira iha fulan-Juñu nian, sá dezafiu mak hasoru, oinsá solusiona no planu iha fulan-Jullu nian.

Prosesu reuniaun Konsellu Konsultivu la’o ho di’ak tebes, hatudu dezempeñu ezekusaun ne’ebé seguru tebes; tantu atividade kada diresaun no instituisaun tuteladu ba Ministériu Justisa, no nia ezekusaun orsamentu.

Marka prezensa iha reuniaun ne’e mak; Diretór-Jerál Henrique de Oliveira Ximenes, Defensór Públiku-Jerál Sergio de Jesus Hornai, Diretór PSIK Vicente Fernandes e Brito, Inspetór Jerál Lucas António da Costa, Sub-Inpetór Jaime Maia, Diretór DNAF Crisogno da Costa Neto, Diretór DNSPRS Helder Cosme Marçal Belo, Diretór DNHJL Nelinho Vital, Diretóra CFJ Marcelina Tilman, Diretór DNRN Vitór da Costa Neto, Diretór DNTP-SC Romão Guterres, Diretór DNDHC Flaviano Moniz Leão no Assessor Gabinete Ministru Justisa Joaozito Viana.

Maria de Lourdes Xavier Lin
Media Officer
Gabinete Ministru Justisa