DÍLI, PN – S.E. Ministru Justisa Ivo Valente halo aprezentasaun Proposta Lei Kombate Tráfiku no Konsumu Ilísitu Droga ba membru Komisaun A, Comissão assuntos Constitucionais, Justiça, Administração Pública, Poder Local e Anti-Corrupção iha Sala Konferénsia Parlamentu Nasionál, loron Kinta-Feira (21/07/2016).

Aprezentasaun Proposta Lei Kombate Tráfiku no Konsumu Ilísitu Droga prezide hosi Prezidente Interinu Komisaun A, Deputadu Arão Noé de Jesus da Costa Amaral no partisipa hosi membru Komisaun A sira.

Prezidente Interinu Arão Noé iha ninia liafuan makloke hateten, “proposta Lei Droga halo ona audiénsia públika ho instituisaun relevante sira balun, halo mós diskusaun ho Ministériu Defeza no Ministériu Saúde, no lokoraik ida ne’e, ami hakarak rona Ministériu Justisa hanesan produtór ba lei ne’e.”

Hafoin halo introdusaun, Prezidente Interinu Arão Noé husu Ministru Justisa atu esplika proposta Lei Kombate Tráfiku no Konsumu Ilísitu Droga.

Ministru Ivo Valente iha ninia esplikasaun hateten katak, “proposta lei ne’e Governu prepara kleur ona, dezde tinan 2013, lei ne’e atu hatu’ur ordenamentu jurídiku internu iha domíniu atu prevene hahalok krimi droga, hodi autoriza mós autoridade judisiáriu sira atu hatu’ur medida investigasaun kriminál ida di’ak no hatu’un kastigu ba autór krimi ida ne’e.”

“Dezenvolvimentu lei ne’e mai hosi matadalan konvensaun internasional nian, Konvensaun Nasões Unidas kona-ba kontra Tráfiku Ilísitu ba Estupefasiente no Substánsia Psikotrópika ne’ebé mak Estadu ratifika ona, no sai hanesan baze fundamentál hodi elabora lei ne’e rasik,” dehan Ministru Ivo Valente.

Nia haktuir liután katak, tráfiku ilísitu ba droga nu’udar krimi ida ne’ebé mak bele hamosu problema iha rai laran, estraga saúde ema nian, estraga seguransa no kualidade sidadaun nia moris. Aliénde ne’e, krimi droga konsidera nu’udar ekonomia ilegál, afeita ba iha estabilidade no seguransa Estadu nian.

Iha sorin seluk, depois-de esplikasaun Ministru Ivo Valente, Prezidente Arão Noé fó mós oportunidade ba Prokuradora-Adjunta Dra. Zélia Trindade no Diretór Polísia Sientífika Investigasaun Kriminál (PSIK) Dr. Vicente Fernandes e Brito hodi halo apresiasaun antes entrega ba iha membru Komisaun A sira halo apresiasaun, hato’o sujestaun no husu klarifikasaun ruma.

Kestaun ne’ebé levanta iha diskusaun projetu proposta lei droga ne’e mak; penalizasaun ba konsumidór droga, distribuidór pesoál no koletiva, aplikasaun pena ba krimi agravadu, oinsá mak deteta distribuidór droga sira, implikasaun siskulasaun droga ba integridade Estadu no protesaun ba testamuña sira. Aliénde ida ne’e, diskute mós papel Komisaun Nasionál Kombate Droga, utilizasaun no oinsá mak kontrolla atividade produsaun droga ba interese médiku nian, kestaun prevensaun, katak presiza iha sensiblizasaun ba sidadaun sira hodi hado’ok án hosi droga no seluk-seluk tán.

Marka prezensa iha diskusaun proposta Lei Droga ne’e mak; Membru Komisaun A Parlamentu Nasionál, Prokuradora-Adjunta Zélia Trindade, Diretór Nasionál PSIK Vicente Fernandes e Brito, Diretór Nasionál DNHJL Nelinho Vital, no assessor no tékniku jurídika sira hosi Ministériu Justisa no Parlamentu Nasionál.

Maria de Lourdes Xavier Lin
Media Officer
Gabinete Ministru Justisa