DÍLI, MF – S.E. Ministru Justisa Ivo Valente partisipa iha Reuniaun Tékniku Komité Revizaun Orsamentu 2017 ba Kapitál Dezenvolvimentu entre tékniku hosi Ministériu Justisa no Ajénsia Dezenvolvimentu Nasionál (ADN) iha Aula Formasaun Ministériu Finansas, Díli, loron Kinta-Feira (25/08/2016).

Reuniaun Tékniku ne’e hodi avalia progressu implementasaun kapitál dezenvolvimentu – projetu infra-estrutura sira iha tinan 2016, diskute planu ajustamentu ba kontinuasaun projetu infra-estrutura sira ne’ebé mak atribui ba iha Ministériu Justisa iha Orsamentu Jerál Estadu Tinan Sívil 2017.

Tékniku ADN aprezenta kona-ba progressu kontrusaun Edifísiu Ministériu Justisa iha Díli, konstrusaun foun ba rezidénsia no Edifísiu Defensoria Públiku iha Munisípiu Bobonaro no Ermera, no mós planu konstrusaun valeta no moru-liur Prizaun Suai nian.

Iha diskusaun ida ne’e, tékniku sira diskute mós aseitasaun no desizaun balun ne’ebé foti ona iha Reuniaun Komité Revizaun Polítika Orsamentu loron horseik (24/08) kona-ba pagamentu adiantadu – advance payment 20% ne’ebé sei halo hosi Konsellu Administrasaun Fundo Infra-Estrurura (KAFI) ba kontratu konstrusaun ba Edifísiu Polísia Sientífiku Investigasaun Kriminál (PSIK) iha tempu badak, no propoin ba Ministru Justisa atu lori proposta finansiamentu konstrusaun Edifísiu Tribunál Rekursu iha reuniaun Komité Revizaun Orsamentu.

Marka prezensa iha Reuniaun Tékniku ne’e; Defensór Públiku-Jerál Sergio de Jesus Hornai, Diretór Diresaun Nasionál Administrasaun no Finansas (DNAF) Crisogno da Costa Neto, Diretór DNSPRS Helder Cosme Marçal Belo, Xéfi Gabinete Ministru Justisa Evangelino Belo no ekipa tékniku sira hosi Ministériu Justisa.