PROPOSTA LEI KOMBATE TRÁFIKU ILÍSITU DROGA APROVA ONA IHA PLENÁRIA PARLAMENTU NASIONÁL

PN, MJ – S.E. Ministru Justisa Ivo Valente halo aprezentasaun Proposta Lei N.º 27/III/3ª, Lei Kombate Tráfiku Ilísitu Droga iha Plenária Parlamentu Nasionál, Díli, loron Segunda-Feira (26/09/2016).

Proposta lei ne’e hodi hatu’ur ordenamentu jurídiku internu iha domíniu atu prevene no kombate atividade krimi droga ne’ebé hahú moris no sei bele buras liután no nia implikasaun negativu mak estraga saúde sidadaun sira, amiasa ba seguransa no estabilidade Estadu nian, no estraga povu nia kualidade moris.

Ministru Justisa, Ivo Valente iha plenária Parlamentu Nasionál informa ba ilustre deputadu sira katak, prosesu dezenvolve lei ne’e halo ona konsultasaun no koordenasaun ho ministériu respetivas, involve Ministériu Saúde, Ministériu Solidaredade Sosiál, Ministériu Negósiu Estranjeiru, Polísia Sientífika Investigasaun Kriminál (PSIK) no sosiedade sívil sira. Aliénde ne’e, antes submete ba Parlamentu Nasionál, Ministru Justisa halo mós aprezentasaun iha Konsellu Ministru hodi hetan apresiasaun.

“Aliénde konsulta ho entidades relevante no sosiedade sívil, Proposta Lei Kombate Tráfiku Ilísitu Droga halo ona diskusaun lubun ida iha Konsellu Ministru, Konsellu Ministru halo apresiasaun no hadia ona kestaun lubun ida depois de ne’e halo aprovasaun,” informa Ministru Ivo Valente.

Hafoin esplikasaun hosi Ministru Ivo Valente, plenária Parlamentu Nasionál (PN) ba diskusaun jeneralidade Lei Kombate Tráfiku Ilísitu Droga ne’ebé prezide hosi Prezidente Ezersísiu PN, Vise-Prezidente Eduardo de Deus Barreto halo votasaun. Proposta lei ne’e, aprova ho votu 38 afavór, laiha abstensaun (0) no laiha kontra (0).

Ho nune’e, proposta Lei Kombate Tráfiku Ilísitu Droga sei lori ba iha diskusaun espesiliadade nian ho ajenda ne’ebé Meza Parlamentu Nasionál sei determina iha tempu besik mai.

Akompaña Ministru Ivo Valente iha diskusaun plenária ne’e mak; Diretór Diresaun Nasionál Assessoria Jurídiku no Lejislasaun (DNAJL) Sr. Nelinho Vital, tékniku lejislasaun DNAJL no assessor jurídiku sira.

Maria de Lourdes Xavier Lin
Media Officer
Gabinete Ministru Justisa