PN, MJ– S.E. Ministru Justisa Ivo Valente aprezenta Proposta Lei N.º 26/III/3ª, kona-ba Lei Prevensaun no Luta Kontra Tráfiku Seres Umanu iha Plenária Parlamentu Nasionál, Díli, loron Tersa-Feira (27/09/2016).

Plenária ba Proposta Projetu Lei N.º 26/III/3ª ne’ebé mak prezide hosi Prezidente Parlamentu Nasionál Dr. Adérito Hugo da Costa hahú ho aprezentasaun relatóriu no paraser hosi Comissão A, Comissão de Assuntos Constitucionais, Justiça, Administração Pública, Poder Local e Anticorrupção, Deputadu ​Arão Noé de J.C. Amaral no Prezidente Comissão A Carmelita Moniz.

Tráfiku Seres Umanu nu’udar violasaun direitus umanus, ofensa dignidade no integridade ema-nian. Tanba-ne’e, Estadu tau prioridade hodi proteje nia sidadaun sira hodi halo prevensaun no kombate tráfiku seres umanu atu respeita dignidade ema nian ho prinsípiu igualdade, direitu ba moris, liberdade, seguransa no integridade pesoál tuir mandatu Konstituisaun Repúblika Timor-Leste.

Iha ninia intervensaun, Ministru Ivo Valente hateten katak, “dezenvolvimentu proposta Lei Luta Kontra Tráfiku Seres Umanus involve ministériu relevante sira, inkluindu Grupu Servisu ba Tráfiku Umanu ne’ebé mak partisipa organizasaun internasionál no nasionál, no mós entidades Majistrados Judiciais, Ministério Público no Defensoria Pública.”

“Aliénde ne’e, proposta lei ida ne’e, hetan mós apresiasaun hosi Konsellu Ministru, nune’e ami hadia artigu balun, no ikus mai, ami submete ba ilustre deputadu sira hodi halo apresiasaun. Depois ne’e, Parlamentu Nasionál mós fó-nia sujestaun balun, no ami tenta hadiak no halo ajustamentu ba lei ne’e,” esplika Ministru Ivo Valente.

Iha biban ne’e, Ministru Ivo Valente saliénta liután kona-ba prinsípiu jerál proposta Lei Prevensaun no Luta Kontra Tráfiku Seres Umanu; krimi tráfiku umanu, moldura de pena ba ema-sira ne’ebé involve iha krimi tráfiku umanu, tráfiku umanu involve minoridade, rehabilitasaun no protesaun ba vítima sira.

Hafoin de diskusaun, Prezidente Adérito Hugo loke ba votasaun jeneralidade nian, Proposta Lei N.º 26/III/3ª passa ho votu afavór 41 deputados, laiha kontra no laiha abstensaun. Tuir ajenda Parlamentu Nasionál, diskusaun plenária ba espesialidade sei halo iha loron Segunda-Feira, 03 Outubru 2016.

Akompaña Ministru Ivo Valente iha diskusaun plenária ne’e mak; Diretór Diresaun Nasionál Assessoria Jurídiku no Lejislasaun (DNAJL) Sr. Nelinho Vital, Diretór Diresaun Nasionál Direitus Umanus no Sidadania (DNDHC) Sr. Flaviano Moniz Leão, tékniku lejislasaun DNAJL no assessor jurídiku sira.