Dili- Iha loron 29 setembru 2016, hola fatin iha Timor Plaza Dili, Ministeriu Justisa Timor Leste liu husi Diresaun Nasional Assessoria Juridika Lejislasaun (DNAJL) ne’ebe servisu hamutuk ho Secretariado Konferensia Ministro Justisa sira husi Nasaun Lian Portuges (CMJPLOP) organiza sorumutu Grupu Trabalho ba Luta Kontra Trafiku Humanu iha ambitu CPLP nian. Sorumutu ba dala tolu ne’e, loke direitamente husi Secretário-Geral CMJPLOP, Nelinho Vital.


Iha nia lian makloke, Sr. Nelinho kontinua husu ba nasaun membru CPLP sira atu tau importansia ba krime trafiku humanu hanesan krimi transnasional, hola medidas nesesariu ba kombate no preve krime trafiku humanu ne’e bazeia ba Planu Asaun ne’ebe Ministru Justisa CPLP nian ratifika tiha ona iha nomos oin nusa nasaun membru sira atu kontinua hametin kolaborasaun servisu ba luta hasoru krime ida ne’e.


Informa mos katak, Timor-Leste iha komitmentu ida bot tebes ba luta kontra trafiku humanu ne’e. Tamba ne’e, iha loron hirak liu ba, 27 setembru 2016, Governu liu husi Ministeriu Justisa, ba defende proposta lei konaba kombate trafiku humanu iha sesaun diskusaun jeneralidade iha plenaria Parlmentu Nasional. Proposta lei ida ne’e, passa ho votus maioria.
Hafoin halo tiha abertura, grupu trabalhu ne’ebe kompostu husi Sra. Dalva M.B.R. Da Cruz (Angola), Sra. Renata Braz Silva (Brasil), Sr. Franklin Afonso Furtado (Cabo Verde), Sr. Julinho Braz da Silva (Guíne Bissau), Sr. Adelino de Assis Leite (Moçambique), Sra. Maria Fatima Russo (Portugal), Sra. Cidalia da Cruz (Timor-Leste) no Sra. Alimary da Silva B. Frota (S.T. Príncipe) hahu halo kedas diskusaun ba pontus importante konaba lejislasaun kontra trafiku humanu, medidas kombate nomos prevensaun nian. Iha diskusaun ida ne’e, Timor-Leste hanesan nasaun uma nain ne’ebe prezidi hela CMJPLOP hato’o mos proposta foun ida atu nasaun membru CPLP nian bele adopta mekanismu prevensaun trafiku humanu UN ninian.
Alemde sorumutu grupu trabalhu, iha loron aban, 30 setembro 2016, sei organiza mos seminariu internasional ida hodi hare konaba lala’ok trafiku humanu iha mundu nomos komunidade CPLP nian no ikus mai atu hamosu mekanismu oin nusa atu bele halo kombate ba krime ida ne’e. Seminariu ida ne’e organiza tamba hetan mos apoiu husi IOM no Governo Norte Amerikanu.