DÍLI,MJ – S.E. Ministru Justisa Ivo Valente ho kualidade hanesan Prezidente Konferénsia Ministru Justisa Paíz sira Língua Ofisiál Portugés (CMJPLOP) halo abertura ba Reuniaun Komisaun Traballu no Konferénsia Internasionál kona-ba Tráfiku Seres Umanu iha ámbitu CPLP iha Timor Plaza, Díli, loron Sexta-Feira (30/09/2016).

Konferénsia internasionál ne’e atu diskute klean abordajem integradu no buka meius kombate kriminalidade tráfiku umanu ne’ebé afeita ba iha setór krusiál sira mak hanesan; seguransa, justisa, relasaun externál, kooperasaun no solidaredade sosiál. Aliénde ne’e, nu’udar mekanismu dialógu ida ho autoridade públiku no sosiedade sívil iha domíniu prevensaun no kombate tráfiku umanu no oinsá fó apoiu ba vítima sira.

Prezidente CMJPLOP Ivo Valente iha ninia diskursu abertura hateten, “reuniaun Komisaun Trabalho kona-ba Tráfiku Seres Umanu iha ámbitu Konferénsia Ministru Justisa Paíz sira Língua Ofisiál Portugés nu’udar oportunidade atu aborda medidas sira ba iha nível nasionál, nasaun idak-idak atu prevene no kombate tráfiku seres umanu, no mós atu ezekuta rekomendasaun no atividade sira ne’ebé mak projeta ona iha Planu Asaun Lisboa nian.”

Iha ámbitu esforsu hodi dezenvolve instituisaun no autoridade públika timorense hodi hasoru krimi tráfiku seres umanu, Ivo Valente esplika kona-ba dezenvolvimentu Polísia Sientífiku Investigasaun Kriminál (PSIK), hanesan institusaun polisiál ne’ebé toma konta ba iha investigasaun krimi organizadu no komplexu, durante ne’e, hetan ona apoiu formasaun hosi Polísia Judisiáriu Portugál, Programa de Apoio à Governação Democrática de Timor-Leste no kooperasaun ho União Europeia em Portugal no Camões – Instituto da Cooperação e da Língua, I.P.

“Polísia Sientífiku Investigasaun Kriminál (PSIK) hetan apoiu oin-oin ba dezenvolvimentu rekursu umanu nian, iha área formasaun teórika espesífika, prátika no ezesísiu hamutuk, investigasaun kriminál, laboratóriu no área espesialista,” dehan Prezidente CMJPLOP Ivo Valente.

Iha sorin seluk, Prezidente Ivo Valente rekoñese dezafiu atuál ne’ebé Cooperação Judiciária internacional no paíz CPLP infrenta, no nia enkoraja atu kontinua hasa’e kapasidade no fahe esperiensia sira oinsá mak hasoru kriminalidade transnasionais iha paíz idak-idak.

Prezidente Ivo Valente mós la haluha hato’o nia agradesimentu bót ba membru Grupu Traballu Tráfiku Umanu Timor-Leste, Ministériu Justisa, Ministériu Negósiu Estranjeiru, Kooperasaun, no Sekretária Estadu Mulher, no ONG Nasionál no Internasionál iha Timor-Leste.

Reuniaun Komisaun Traballu no Konferénsia Internasionál ne’e organiza hosi Ministériu Justisa Timor-Leste no Organizasaun Migrasaun Internasionál (IOM) ne’ebé partisipa Pontu Fokál Tráfiku Umanu hosi paíz sira Língua Portugés nian mak hanesan; Angola, Brazil, Guiné-Bissau, Cabo Verde, Moçambique, Potugál no São Tomé e Príncipe no Timor-Leste.

Maria de Lourdes Xavier Lin
Media Officer
Gabinete Ministru Justisa