MINISTRU IVO VALENTE HALO LANSAMENTU ATENDIMENTU OFFLINE BILHETE IDENTIDADE BA SUKU IZOLADU SIRA IHA MUNISÍPIU BOBONARO

HATÁZ, MJ – S.E. Ministru Justisa Ivo Valente halo lansamentu atendimentu offline Bilhete Identidade (BI) ba suku izoladu sira (suku-tolu) mak hanesan; Suku Hatáz, Atabae no Aidabaleten iha Postu Administrativu Atabae, Munisípiu Bobonaro, loron Sexta-Feira (30/09/2016).

Lansamentu BI hahú ho divulgasaun lei nasionalidade ne’ebé hala’o hosi Diresaun Nasionál Rejistu Notariadu (DNRN) no Konservatóriu Munisípiu Bobonaro, no hetan antusiasmu maka’as tebes hosi líder komunitáriu sira, líder tradisionál, no povu hosi Suku Hatáz.

Atendimentu Bilhete Identidade (BI) ba populasaun sira importante tebes, aliénde povu atu hetan nia direitu ba identidade sivíl, lori besik atendimentu públiku nu’udar obrigasaun Governu nian liu hosi Ministériu Justisa atu implementa Decreto-Lei Nú. 2/2014 kona-ba Regime Jurídico da Identificação Civil ba Timor-oan sira, tantu iha área urbana no iha fatin izoladu sira.


Minisru Ivo Valente iha nia lansamentu offline ba BI ne’e hateten, “iha razaun atu halo atendimentu offline ba BI mai iha ne’e, tanba povu barak sei hela iha área izoladu, Governu, Ministériu Justisa liu hosi Rejistu Notariadu hakarak lori besik atendimentu públiku mai iha Hatáz, hodi nune’e povu Hatáz, Atabae no Aidabaleten la-presiza ona atu la’o to’o iha Maliana hodi hetan nia identidade sívil, ho Bilhete Identidade, jurídikamente ita-bót sira sai ona sidadaun Timor-Leste nian.”

“Tanba-ne’e, Governu sei halo esforsu hotu-hotu no intensivu liután, atu nune’e, suku hotu-hotu ne’ebé do’ok hosi sentru administrasaun públiku nian bele hetan lalais nia Bilhete Identidade, ami sei ba suku idak-idak, maske neneik maibé povu rai ne’e tenke hetan duni nia-direitu ba sidadania,” espressa Ministru Ivo Valente.

Iha lansamentu BI, Ministru Ivo Valente mós esplika kona-ba importansia sidadaun sira bainhira iha ona BI, oinsá rekezitus sira atu hetan BI, esforsu no planu Governu nian hodi hametin páz nune’e dezenvolvimentu bele to’o lalais iha fatin izoladu sira, apresiasaun Governu ba povu Postu Administrativu Atabae ne’ebé hatudu disiplina tebes, no enkoraja povu Hatáz atu mantein unidade hodi asegura estabilidade nasionál, no mós seluk-seluk tán.

Hafoin remata serimónia lansamentu offline ba BI, Ministru Ivo Valente halo vizita ba fatin atendimentu BI, no aproveita mós tempu hodi anima komunidade sira ho tebe-tebe no foto hamutuk.

Marka prezensa iha lansamentu BI ne’e mak, Inspetór Jerál Ministériu Justisa Dr. Lucas António da Costa, Diretór DNRN Dr. Vitór da Costa Neto, Gabinete Diretór Jerál, Diretór Konservatóriu Minisípiu Bobonaro Dr. João da Costa Maupellu, Administradór Postu Administrativu Atabae, Polísia Eskuarda Atabae, Diretór DNAF Dr. Crisogno da Costa Neto, Xéfi Gabinete Ministru Justisa Dr. Evangelino Belo, tékniku profesionais DNRN, Xéfi Suku no Xéfi Aldeia sira, profesores, alunus, populasaun Suku hatáz, no seluk-seluk tán.

Evangelino Belo
Xéfi Gabinete Ministru Justisa
Ministériu Justisa