DÍLI, DNRN - S.E. Ministru Justisa Ivo Valente fó orientasaun ba dirijente ofisiais Ministériu Justisa hosi munisípiu sira kona-ba prosesu destakamentu funsionáriu ba munisípiu, oinsá dezenvolve liña koordenasaun no implementasaun polítika desentralizasaun administrativa ne’ebé mak hala’o iha Aula Konferénsia Diresaun Nasionál Rejistu no Notariadu (DNRN), Bebora Díli, loron Kinta-Feira (06/10/2016).

Iha ninia mensajen ba dirijente ofisiais sira, Ministru Ivo Valente hateten, “ha’u konkorda ho demanda Komisaun Funsaun Públika atu haruka funsionáriu sira ba iha munisípiu idak-idak, tanba polítika desentralizasaun ne’e atu lori besik governasaun no povu presiza tebes prezensa Estadu nian iha sira-nia le’et.”

“Governu tenke besik liu ita-nia povu, signifika katak, desentralizasaun sei lori ita ba besik povu. Funsionáriu públiku nu’udar liman-ain Estadu besik povu, ita tenke servi di’ak ba ita-nia povu, maske sei hasoru dezafiu oin-oin maibé ita-bót sira iha ona kapasidade nato’on hodi hala’o servisu loron-loron nian. Tanba, durante ne’e ita-bót sira hetan ona kapasitasaun iha área oin-oin, simu mós formasaun iha rai laran no iha rai liur; hetan ona matenek no esperiénsia iha Portugál, Malásia, Indonésia no rai seluk-seluk tán,” enkoraja Ministru Ivo Valente.

Reuniaun ne’ebé partisipa Diretór-Jeral Ministériu Justisa Henrique de Oliveira Ximenes, Inspetór-Jerál Lucas António da Costa, Diretór DNAF Crisogno da Costa Neto, Diretór Terras Propriedades Romão Guterres no Diretór DNRN Vitór da Costa ne’e halo diskusaun vise-versa entre Ministru Ivo Valente ho ofisiais munisípiu sira.

Kestaun sira ne’ebé levanta hosi ofisiais munisipais sira mak oinsá koordenasaun no relasaun servisu ho Ministériu Justisa iha futuru, existensia no papel konservatóriu no notáriu, jestaun patrimóniu no atribuisaun kompetensia ba diretores munisípiu em relasaun ho administrasaun munisípiu, no asuntu seluk-seluk tán.

Maria de Lourdes Xavier Lin
Media Officer
Gabinete Ministru Justisa