DÍLI, GMJ – S.E. Ministru Justisa Ivo Valente halo reuniaun ho ekipa fasilitadór sira kona-ba tékniku evaluasaun servisu Ministériu Justisa ba tinan 2016, no iha tempu hanesan entrega mós matadalan evaluasaun nian ba Koordenadór Interinu Komisaun Organizadora ba Evaluasaun Sr. Antonio Verdial de Sousa iha Gabinete Ministru Justisa (GMJ), Díli, loron Sexta-Feira (18/11/2016).

Hanesan kultura servisu tinan-tinan nian, fim-de-ano, Ministériu Justisa sempre avalia án no halo reflesaun hodi hatene dezempeñu, progressu servisu no dezafiu sira ne’ebé ministériu hasoru dadaun. Ho avaliasaun no reflesaun, espera tinan foun mai Ministériu Justisa sei servisu di’ak liu kompara ho tinan ida ne’e, objetivu prinsipál mak oinsá kontribui di’ak liután ba dezenvolvimentu justisa ne’ebé hatu’ur ona iha Planu Estratéjiku Setór Justisa 2030.

Ministru Ivo Valente iha reuniaun ne’e hateten, “evaluasaun ne’e sei engloba susesu no dezafiu sira entre tinan 2010-2016 ne’ebé mak Ministériu Justisa hasoru no atinzi ona, inklui última reflexão ba ha’u-nia mandatu, nune’e hodi evalua mós ha’u-nia dezempeñu hanesan responsável polítiku durante tinan-nén (6) nia laran hamutuk ho ita-bót sira iha ne’e.”

“Aliénde ne’e, avaliasaun komprenhensivu sei distinji rekomendasaun ba servisu Ministériu Justisa, nune’e bele rai lisaun di’ak ba memoria institusionál iha dezenvolvimentu setór justisa iha futuru mai,” dehan Ministru Ivo Valente.

Iha sorin seluk, Señor Ministru Ivo Valente husu ba fasilitadór sira atu halo avaliasaun profunda, atu nune’e bele deskobre frakeza no oportunidade sira hodi hadiak án iha futuru, no mós sukat forsa instituisaun nian hodi empeña servisu Ministériu Justisa di’ak liután ba tinan oin mai, tinan 2017 nian.

Depois-de reuniaun, Ministru Ivo Valente aprova matadalan evaluasaun nian no entrega ba iha Koordinadór Antonio Verdial de Sousa hodi implementa. Aliénde ne’e, enkoraja atu prepara didi’ak evaluasaun no partilha nia-deseju sucsesso ba ekipa fasilitadór sira.

Marka prezensa iha reuniaun ne’e mak; Assessor Ministru Justisa hanesan koordenadór ba fasilitadór Sr. Joaozito Viana, Assessora DNDHC Sra. Maria Rosa Xavier, Diretór DNDHC Sr. Flaviano Moniz no Xéfi Departementu Planeamentu do Gabinete Diretór-Jerál Ministériu Justisa Sr. Isolino Marques.