MINISTRU JUSTISA HALO VERIFIKASAUN BA KÁPA PASSAPORTE ELETRÓNIKA IHA HEADQUARTER KOMSCO DAEGU, KOREA DE SUL

DAEGU, KOREA DE SUL – S.E. Ministru Justisa, Ivo Valente hamutuk ho nia-ekipa tékniku sira halo verifikasaun kápa no pájina passaporte eletróniku iha Headquarter KOMSCO, Korea Minting and Security Printing Corporation iha Daegu, Korea de Sul, loron Kuarta-Feira (07/12/2016).

KOMSCO nu’udar korporativa propriedade Governu Korea de Sul nian ne’ebé mak responsabiliza ba imprimi moeda no dokumentus Estadu ne’e lokalizadu iha Daejeon, Daegu, Korea de Sul.

Hafoin halo verifikasaun kápa no pájina passaporte eletróniku, Ministru Ivo Valente hateten katak, “loron ohin importante tebes ba Timor-Leste, loron históriku dia 07 Dezembru, loron bainhira Indonésio halo invazaun no aneksasaun mai Timor-Leste, no depois 41 anos, ohin Timor-Leste hanesan nasaun independente ida hahú ona ho passaporte propiu ida, ita tenke agradese tebes ba ukun rasik án ida ne’e.”

Verifikasaun kápa no pájina passaporte eletróniku iha Korea de Sul hanesan faze ikus ba prosesu validasaun tomak, hahú hosi dezeñu, layout, datapage, produsaun surat tahan, plástiku, teste ba planta impressaun nian, produsaun espécime, kardenete produsaun no planu transportasaun.

Ministru Ivo Valente dehan katak, “importante tebes atu hare’e faze ikus ne’e, hodi hare’e besik produsaun kapa no pájina passaporte Timor-Leste nian iha Korea de Sul. Aliénde atu asegura kualidade produsaun, hodi hatene mós validade dadus no seguransa passaporte nian.”

“KOMSCO hanesan empreza estatál, korporativa propriedade Governu Korea de Sul nian, iha esperiénsia ás iha tinan naruk nia-laran hodi halo produsaun moeda no dokumentus Estadu nian. Tanba-ne’e, Timor-Leste bele tau konfiansa ba empreza ne’e hodi responsabiliza ba passaporte eletróniku Timor-Leste nian,” dehan Ministru Ivo Valente.

Diskusaun lubun halo ho dirijente KOMSCO hafoin halo verifikasaun ba kápa no pájina passaporte Timor-Leste. Ministru Ivo Valente iha reuniaun esplika nia-objetivu vizita traballu ne’ebé mai ho nia-ekipa tékniku sira. Prezensa ekipa tékniku no dirijente Ministériu Justisa hodi asegura kualidade no seguransa passaporte, inklui oinsá garante produsaun tuir kalendáriu produsaun no emisaun nian.


Reuniaun ida ne’e mós buka komprende di’ak liután tipu seguransa, kór passaporte no orijinalidade tuir kontratu no Lei Passaporte Eletróniku Timor-Leste (PETL) haruka, katak, sei uza sistema modernu no dadus pesoál sei tau iha microchip nia laran, hanesan padraun ne’ebé hatu’ur ona hosi International Civil Aviation Organization (ICAO).

Depois-de halo verifikasaun, KOMSCO promete sei haruka espécime (ezemplu kardeneta passaporte) antes dia 25 Dezembru 2016 ba Ministériu Justisa. Espécime kardeneta ho tipos-hát mak hanesan; diplomata, kómun, servisu no estranjeiru hodi halo teste ba aplikasaun uzu.

Akompaña Ministru Ivo Valente iha prosesu verifikasaun ba kápa no pájina passaporte mak; Diretór Nasionál Rejistu Notariadu Sr. Vitór da Costa, Diretór DNAJL Sr. Nelinho Vital, Diretór DNAF Sr. Crisogno da Costa Neto, Funsionária Asuntu Jurídika MNEK Sra. Fenícia Michella F. C. Amaral, Tékniku IT Ministériu Justisa Sr. Pinso Amado Sei-Sei Vieira no Sr. Inocencio Jose Alves, no Assessor Komunikasaun Sosiál Ministru Justisa Joaozito Viana.

Nelinho Vital
Diretór Nasionál
DNAJL