MINISTRU IVO VALENTE HALO ABERTURA BA REUNIAUN AVALIASAUN PROGRAMA FORMASAUN FUNSIONÁRIU PÚBLIKU MINISTÉRIU JUSTISA IHA TINAN SÍVIL 2016

DÍLI, MJ – S.E. Ministru Justisa, Ivo Valente halo abertura ba reuniaun avaliasaun programa formasaun funsionáriu públiku Ministériu Justisa iha Tinan Sívil 2016 ne’ebé finansia hosi Fundo Dezenvolvimentu Kapitál Umanu (FDKU) iha Centro de Formação Jurídica e Judiciária Caicoli, Díli, loron Kinta-Feira (26/01/2017).

Avaliasaun formasaun ne’ebé mak sei hala’o durante loron-rua (26-27/01/2017) ho titúlu, “avaliasaun ba formasaun nu’udar sasukat ida ba dezenvolvimentu rekursu umanu iha futuru,” hatu’ur segimentu programa formasaun Ministériu Justisa no buka elabora dadus ba dezafiu sira, inklui buka hatene mós posibilidade no prioridades tipu formasaun sira mak importante tebes ba funsionáriu Ministériu Justisa nian iha tinan 2017.

Aliénde ne’e, réve hikas polítika kooperasaun ho instituisaun fornesedór formasaun nian ne’ebé mak funsionáriu Ministériu Justisa tuir ona iha tinan 2016 atu hatene progresu no nível koñesimentu formadu, nia dezafiu no implikasaun prátika servisu loron-loron nian.

Ministru Ivo Valente iha nia abertura hateten, “formasaun sira ne’ebé hala’o ona importante ba funsionáriu públiku atu eleva sira-nia kapasidade, hasa’e abilidade hodi nune’e hala’o nia servisu di’ak liután. Tanba-ne’e, iha tinan 2016, Ministériu Justisa halo formasaun barak iha rai liur; iha Jakarta, Denpasar, Yogyakarta, Surabaya, Portugál no fatin sira seluk tán.”

Avaliasaun ne’e atu hatene tuir sá benefísiu mak ita hetan ona, presiza atu kontinua ka la’e, sé kontinua tanbasá. Presiza atu identifika formasaun foun tán, no ha’u husu atu involve funsionáriu no diretór sira hosi munisípiu sira, tanba atendimentu públiku sei barak iha ita-nia munisípiu; dehan Ministru Ivo Valente.

Iha serimónia abertura ida ne’e, Ministru Ivo Valente husu mós halo avaliasaun tenke hare’e abilidade formadu sira nian depois-de hetan formasaun, dezafiu sira mak sira hsoru durante tuir formasaun, nune’e mós oinsá nia aplikasaun iha fatin servisu nian no diskute nesesidade formasaun iha futuru nian.

Reuniaun avaliasaun ne’ebé partisipa Diretór-Jerál no Inspetór-Jerál Ministériu Justisa, inklui dirijente ofisiais nasionál no munisípiu sira la’o di’ak tebes. Marka prezensa mós funsionáriu hosi Sekretáriadu Fundo Dezenvolvimentu Kapitál Umanu (FDKU), Polísia Sientífiku Investigasaun Kriminál (PSIK) no Defensoria Públiku-Jerál ne’e hahú ho aprezentasaun ne’ebé hala’o hosi reprezentante formadu iha área idak-idak. Aprezentasaun engloba saída de’it mak sira aprende durante formasaun, apoiu lojistíku, dosente ka formadór sira, lisaun ne’ebé sira aprende ba prátiku servisu lorloron nian no dezafiu sira.

Iha tinan 2016 liubá, formasaun rekursu umanu ne’ebé funsionáriu Ministériu Justisa tuir engloba área abilidade oin-oin mak hanesan; área administrasaun no finansas, lojistíku, protokolu no reseptionista, audit, arkivu eletróniku, graphic design, mídia no seluk-seluk tán.

Maria de Lourdes Xavier Lin
Media Officer
Gabinete Ministru Justisa