DÍLI, PSIK – S.E. Ministru Justisa Ivo Valente ne’ebé akompaña hosi Komisáriu Komisaun Funsaun Públika Sr. José Tello, Diretór-Jerál Ministériu Justisa Sr. Henrique de Oliveira Ximenes no Diretór PSIK Vicente Fernandes e Brito fó-posse ba Xéfi Departementu nain-6 ne’ebé sei hala’o nia kna’ar iha Polísia Sientífiku Investigasaun Kriminál (PSIK) iha Aula Sentru Formasaun Investigasaun Kriminál, Díli, Kuarta-Feira (08/02/2017).

Serimónia fó-posse kargu xéfia iha ámbitu Polísia Sientífiku Investigasaun Kriminál ba departementu nén mak hanesan; Departementu Interpol, Apoiu PSIK, Armanamentu no Siguransa, Assessoria Júridiku no Relasaun Públika, Gabinete Inspesaun no Disiplina, no mós Laboratóriu.

Iha nia diskursu, Ministru Ivo Valente partilha nia orgullu no parabéns ba emposadu, PSIK no sira-nia família. Nia husu atu uza kargu ho prudenti hodi kontinua hakbi’it Ministériu Justisa la’o ba oin nafatin, progresivamente hodi atinji objetivu Planu Estratéjiku Dezenvolvimentu Nasionál, liu-liu iha área dezenvolvimentu justisa nian. Maske PSIK hanesan instituisaun ne’ebé ho idade ki’ik, maibé Ministru Ivo Valente fiar katak iha tinan 10 ka 15 mai tán sei di’ak liu, em termos rekursu umanos, fasilidades no infra-estrutura hodi apoiu investigasaun ba kombate krimi organizadu no komplexu sira.

“Kargu ne’e temporáriu iha administrasaun públika nian ne’ebé buat hotu laós permanente, ita-bót sira mak hetan ona oportunidade, tuir mai sei ba kolega seluk mak sei mai asumi kargu ne’e. Sira ne’ebé mak seidauk hetan kargu kontinua servisu didi’ak hodi empeña imi-nia profesionalizmu, labele laran ki’ik tanba ita-bót sira-nia tempu sei mai,” enkoraja Ministru ivo Valente.

Ministru Ivo Valente hatutan katak, “hanesan responsável maximu Ministériu Justisa orgullu ho progressu ne’ebé PSIK atinzi ona, progressu hirak ne’e konta ho esforsu no servisu maka’as imi-hotu nian, importante liu mak tenke separa kargu administrasaun públiku hosi influensia partidu polítiku, ne’e mak esforsu ne’ebé mak hala’o dadaun iha VI Governu Konstitusionál. Tanba-ne’e, agora dadaun selsesaun méritu ba kargu xéfia hotu-hotu iha Ministériu Justisa, halo mós ba ministériu hotu-hotu hodi eskoila matenek nain sira.”

Nia kontinua esplika mekanizmu selesaun méritu ne’ebé haktuir ona iha Lei Funsaun Públiku nian, sá desizaun ba kestaun ne’ebé halo ona iha Konsellu Ministru no prosesu inisiál ba selesaun por méritu mak la’o dadaun iha Ministériu Justisa.

Iha sorin seluk, Diretór PSIK Vicente Fernandes e Brito mós agradese no fó-nia parabéns ba emposadu sira. Nia husu ba emposadu, xéfi departementu sira atu kontinua tau ás profesionalizmu, responsabilidade no lealidade nu’udar ajente PSIK. Diretór ne’e mós espressa nia-orgullu ba dinamika ne’ebé la’o dadaun iha PSIK, relata mós progressu servisu ne’ebé hala’o dadaun tuir kna’ar no atribuisaun PSIK, no amostra konfiansa sira hosi instituisaun Estado nian, liu-liu Ministériu Públiku ba servisu PSIK iha área investigasaun nian.

Iha serimónia tomada de posse ne’e, reprezentante emposadu, Xéfi Armanamento no Seguransa Dedy da Silva mós expressa sira-nia agradesimentu ba fiar ne’ebé Ministru Justisa no PSIK deposita ba sira. Nia mós promete sei hala’o kna’ar ho kualidade tuir atribuisaun servisu ne’ebé sira asumi.

Marka prezensa mós iha serimónia tomada de posse ne’e mak; Inspetór-Jerál Ministériu Justisa Lucas António da Costa, Adjunto Inspetór António Fátima no Jaime Maia, Adjunto Diretór PSIK Adino Nunes Cabral, família emposadu, formadór internasionál PSIK, diretór nasionál no xéfi departementu sira iha ámbitu Ministériu Justisa.

Maria de Lourdes Xavier Lin
Media Officer
Gabinete Ministru Justisa