DÍLI, MJ – S.E. Ministru Justisa Ivo Valente prezide reuniaun regulár Konsellu Konsultivu Ministériu Justisa ba Daruak nian iha tinan 2017 iha Sala Reuniaun Ministériu Justisa, Díli, iha loron Kinta-Feira (09/02/17).

Reuniaun ne’e ho assuntu prinsipál mak hanesan, aktualiza atividade kada diresaun iha fulan-Janeiru no planu servisu fulan-Fevereiru nian, selesaun por méritu ba direjente ofisiál eh kargu xéfia sira tuir Lei Funsaun Públika no mós diskuti kona-ba relatóriu sussesór mandatu servisu Vossa Excia. Ministru Justisa iha VI Governu Konstitusionál. Aliénde ne’e, diskute preparasaun ba reuniaun CPLP no planu atu entrega Presidensia Konferénsia Ministru Justisa CPLP ba Basil iha tinan ida ne’e.

Iha reuniaun ne’e, Ministru Ivo Valente hateten, “reuniaun ohin atu hare’e di’ak liután servisu kada diresaun idak-idak nian, inklui ita atu rona kona-ba sá dezafius mak ita infrenta iha implementasaun Planu Asaun Anuál (PAA) 2017, esforsu saída mak ita halo ona hodi aselera ita-nia servisu hirak ne’e, atu nune’e, ita hala’o servisu di’ak liután iha fulan-Fevereiru ida ne’e.”

Depoiz-de abertura reuniaun Konsellu Konsultivu, Ministru Ivo fó oportunidade ba diretór sira hosi diresaun ida-idak atu aprezenta servisu no dezafiu sira ne’ebé sira infrenta dadaun.

Diretór DNSPRS, Helder Cosme Marçal Belo aprezenta kona-ba funsionamentu Prizaun Suai, prosesu rekrutamentu Guarda Prizionál, planu muda prizoneirus sira balun ba iha Prizaun Suai no prosesu tender ba alimentasaun ba prizoneirus sira.

Iha fatin hanesan, Diresaun Rejistu Notariadu (DNRN) hato’o kestaun imprimi kaderneta passaporte, atendimentu públiku, komunikasaun ho kompañia ba produsaun kardeneta no blanco sertidaun nascimento no seluk-seluk tán. Responde ba iha passaporte elektróniku (E-Passport) katak, iha fulan-Fevereiru ne’e, ekipa tékniku Gemalto ho Visimitra atu desloka mai Díli hodi fó treinu ba ekipa tékniku sira no IT Ministériu Justisa nian, no hahu halo instalasaun iha edifisiu DNRN, nune’e fulan-Abril sei halo lansamentu Passaporte Elektróniku Timor-Leste tuir planu Ministériu Justisa.

Sentru Formasaun Juridika e Judisiaria (CFJJ) mos halo dadaun preparasaun ba rekrutamentu formadores ne’ebe foin lalais ne’e, Prezidente Konsellu-Jerál Centro Formação Jurídica e Judiciária (CFJJ) atuál Ministru Justisa no membru konseleiru sira eskoila tiha ona formadór sira, no CFJJ mak halo kontatu no hakat ba prosesu kontratasaun nian.

Ministru Ivo fó orientasaun atu aselera prosesu kontratasaun ba formadór majistradu internasionál sira hosi Estadu-membru CPLP hodi fó apoiu ba Centro de Formação Jurídica e Judiciária. CFJJ atu esforsu nafatin hodi husu apoiu hosi kooperasaun husi membru CPLP nian, nune’e formasaun ba majistradu judisiál no ofisiais justisa em termos formasaun leis, Lingua Portugés no deontolojia profisionais la’o tuir planu.

Hosi Diresaun Nasionál de Assessoria Jurídica e Legislaçao (DNAJL), Diretór Nelinho Vital hato’o mós kona-ba Lei Rai ne’ebé Parlamentu Nasionál aprova ona, prosesu submisaun ba Presidente-Repúblika atu halo apresiasaun no promulga, aprovasaun lei ne’e hetan aprovasaun 57 votasaun, 57 afavór, kontra 0, abstensaun 0, iha loron Segunda-Feira (6/02/) foin lalais ne’e. Nia mós informa katak, oras ne’e dadaun, Lei Expropriasaun debate na espesialidade iha Komisaun A Parlamentu Nasionál.

Iha sorin seluk, Polísia Sientífiku Investigasaun Kriminál (PSIK), Diresaun Direitus Umanos no Sidadania (DNDHC), Diresaun Administasaun no Finansas (DNAF), Gabinete Inspesaun no Auditoria no Gabinete Diretór-Jerál halo mós aprezentasaun ba kona-ba progresu servisu fulan-Janeiru, dezafiu sira no mós planu ezekusaun programa ba inísiu tinan ida ne’e.

Hafoin aprezentasaun kada diresaun idak-idak, Ministru Ivo husu ba diretoris sira hotu tenke halo komunikasaun ba Diresaun DNAF ne’e importante tebes, liu-liu ba diresaun ida-idak nia ofisiál finansas, atu nune’e prosesu ezekusaun programa no orsamentu tuir lei no mekanizmu propiu hirak ne’ebé mak Governu hatu’ur ona iha Tinan Fiskál 2017.

Marka prezensa iha reuniaun ne’e mak hanesan; Ministru Justisa Ivo Valente, Diretór-Jerál Henrique de Oliveira Ximenes, Diretór DNRN Sr. Victor da Costa Neto, Inspetór Lucas António da Costa, Diretór DNAF Crisogno da Costa Neto, Diretór DNAJL Nelinho Vital, Diretór, Diretór DNSPRS Helder Cosme Marçal Belo, DNDHC Flaviano Moniz Leão, Diretór CFJJ em ezersísiu Lourenço T. Ferreira, Diretór PSIK em ezersísiu Adjunto Adino Nunes Cabral, Diretór DNTP-SC em ezersísiu Gusto Lafo, Sub-Inpetór António de Fatíma, Xéfi Gabinete Ministru Justisa Evangelino Belo, Assessor Ministru Justisa Estela Alves dos Reis Amaral no Joaozito Viana.

Maria de Lourdes Xavier Lin
Media Officer
Gabinete Ministru Justisa