DILI, MJ – S.E. Ministru Justisa Ivo Valente apela ba funsionáriu Ministériu Justisa atu asegura nafatin funsionamentu servisu públiku iha Eleisaun Prezidente-Repúblika. Apelu ne’e hato’o bainhira sai inspetór ba serimónia Isár Bandeira primeiru-semana fulan-Marsu iha estasionamentu Ministériu Justisa, Díli, loron Seguda-Feira (06/03/2017).

Isár bandeira ne’ebé partisipa hosi dirijente ofisiais no funsionáriu públiku Ministériu Justisa tomak nu’udar atividade rotina instituições Governu nian no obrigatóriu ne’ebé hala’o kada inísiu fulan-fulan. Fulan-Marsu ida ne’e, Isár Bandeira responsabiliza hosi Diresaun Nasionál Assessoria Jurídika no Lejizlasaun (DNAJL) Ministériu Justisa.

Hanesan inspetór ba isár bandeira, Ministru Ivo Valente aproveita oportunidade ida ne’e hodi fó hanoin hikas ba servidór públiku sira no dirijente Ministériu Justisa tomak atu ezekuta Planu Asaun Anuál (PAA) 2017 ho rigorozu, atu nune’e povu bele sente dezenvovimentu iha setór justisa. Nia husu ba diretór sira no xéfi departementu hotu-hotu atu hare’e didi’ak planu, kolabora ba malu no ezekuta didi’ak, atu nune’e atinzi metas Planu Estratéjiku Setór Justisa nian.

Relasaun ho Eleisaun Prezidente-Repúblika, Ministru Ivo Valente apela ba funsionáriu públiku Ministériu Justisa ne’ebé ativa iha prosesu kampaña eleitorál, atu husu pedidu lisensa, labele lori atributu partidu ka kandidatu sira nian iha servisu fatin no bandu atu labele uza patrimóniu Estadu mak hanesan; kareta, motorizada no fasilidade Estadu sira seluk hodi hala’o atividade polítika.

“Hanesan sidadaun, ema idak-idak, ita-nia Constituição da República asegura direitu ema-hotu nian atu hili no involve iha atividade polítika. Maibé, hanesan funsionáriu públiku e administrativamente halo ezekusaun ba servisu públiku nian tenke komporta nia-neutralidade, e kuandu hakarak involve prosesu kampaña no ativu iha atividade eleitorál tenke husu lisensa sem vensimentu tuir lei haruka,” apela Ministru Ivo Valente.

Sorin seluk, Ministru Ivo Valente mós husu ba Inspetór-Jerál Ministériu Justisa no diretór sira-hotu atu kontrola funsionáriu sira hotu-hotu, no asegura katak patrimóniu Estadu nian só utiliza de’it ba programa no atividade Ministériu Justisa nian.

Isár Bandeira ne’e partisipa hosi dirijente ofisiais sira, inklui funsionáriu públiku hosi Gabinete Diretór-Jerál, Gabinete Inspesaun no Auditória, Diresaun Nasionál Administrasaun no Finansas (DNAF), Diresaun Nasionál Rejistu Notariadu (DNRN), Diresaun Nasionál Terras no Propriedade (DNTP-SC), Diresaun Nasionál Servisu Prizionál no Reinsersaun Sosiál (DNSPRS), Diresaun Nasionál Direitus Umanus no Sidadania (DNDHC), Diresaun Nasionál Assessoria Jurídika no Lejislasaun (DNAJL), Defensoria Públiku-Jerál no Polísia Sientífika Investigasaun Kriminál (PSIK).

Maria de Lourdes Xavier Lin
Media Officer
Gabinete Ministru Justisa