MINISTRU IVO VALENTE FÓ-POSSE BA NOTÁRIU NO KONSERVADÓR FOUN MINISTÉRIU JUSTISA IHA DNRN

Versão para impressão

DÍLI, DNRN – S.E. Ministru Justisa Ivo Valente fó-posse ba notáriu no konservadór Ministériu Justisa hamutuk ema nain 14 iha Aula Konferénsia Diresaun Nasionál Rejistu Notariadu (DNRN), Mandarin iha Díli, loron Kinta-Feira (30/03/2017).

Serimónia fó-posse ida ne’e, akompaña Ministru Ivo Valente mak, Sekretáriu Estadu Terras no Propreidades (SETP), Sekretária Ezekutivu Komisaun Funsaun Públika (KFP) Maria de Jesus Sarmento no Diretór-Jerál Ministériu Justisa Henrique Ximenes de Oliveira.

Hamutuk notáriu nain 9 no konservadór nain 5 mak simu ona posse ba daruak nian; notáriu no konservadór hirak ne’e destakadu ona iha Munisípiu hotu-hotu (12 municipios) no Rejiaun Adminstrativa Oe-Cusse.

Notáriu no konserdór foti kna’ar atu asegura kestaun relasaun siguransa em termos ekonomia no sosiál, reduz konflitu judisiál no haforsa ámbiente negócios ne’ebé kondusivu ba dezenvolvimentu ekonómiku no sosiál iha ita-nia rai.

Relasaun ho kna’ar notáriu no konservadór sira, Ministru Ivo Valente iha ninia diskursu hateten, servisu notária importante tebes ba iha dezenvolvimentu ekonomia no sosiál, ho prezensa sira nian halo VI Governu, Ministériu Justisa marka hakat ida tán hodi kompleta instrumentu legais sira hodi valida servisu komériu no rezolve konflitu aktu tributária nian, hasoru krimi iha natureza ekonómika, finanseira no branqueamento de capitais.

“Prezensa notáriu no konservadór ba tinan 5 ka 10 oin mai sei hasoru dezafiu lubuk ida, tanba ita-bót sira nia servisu tuir evolusaun dezenvolvimentu ekonómiku no sosiál iha ita-nia rai. Tanba-ne’e, tenke aprende no hasa’e imi-nia koñesimentu nafatin, Centro de Formação Jurídica e Judiciária (CFJJ) iha Gabinete Asistensia Legál, senu kazu hasoru difikuldade ka problema legál ruma bele konsulta ho ita-nia konsultór sira atu nune’e evita halo sala,” dehan Ministru Ivo Valente.

Iha biban ne’e, Ministru Ivo Valente fó-nia parabéns no agradese ba emposadu sira no sira-nia família ne’ebé halo ona sakrifísiu barak, sakrifika família ne’ebé determina ona susesu formasaun naruk antes sai notáriu. Ministru Ivo Valente mós fó-nia agradesimentu ba Governu Portugál liu-liu Ministra Justisa Portugal, tanba ho protokolu kooperasaun hadalan ona Timor-oan (natáriu sira) bele tuir formasaun fulan-tolu iha Portugal.

Ministru Ivo Valente kontinua enkoraza notáriu no konservadór sira atu servisu kuidadu tebes, hodi halo sakrifísiu tuir Estadu nia posibilidade, servisu ho fasilidade minimu ne’ebé Governu iha dadaun, no promete neneik-neneik sei hakonu fasilidade no lojistíku hodi apoiu servisu notáriu iha munisípiu hotu-hotu.

Iha sorin seluk, Diretór DNRN Vitór da Costa Neto iha nia aprezentasaun relatóriu informa katak, emposadu sira hamutuk ema nain 14 mak simu posse ne’e, tuir ona formasaun durante tinan-tolu nia laran, sira tuir ona prosesu naruk, hosi etapa teoria, estájiu no prátika.

“Ha’u hakarak informa katak, notáriu no konservadór sira tuir ona formasaun tempu naruk, nune’e ho notáriu hirak ne’e kobre ona munisípiu 12 no Rejiaun Administrativu Oe-Cusse, Governu bele orgullu no fiar metin ba emposadu sira hodi hala’o sira nia kna’ar profisaun nian,” informa Diretór Vitór.

Iha oportunidade ne’e, reprezentante emposadu sira fó sira-nia agradesimentu ba Ministru Justisa, formadór no Governu Portugal. Sira mós konta sira-nia esperiénsia iha prosesu formasaun, dezafiu ne’ebé sira hasoru no kompremete atu servisu nu’udar notáriu no konsevadór ne’ebé servi povu ho kualidade no profesionál.

Marka prezensa iha serimónia tomada de posse ne’e mak; Inspetór-Jerál Ministériu Justisa Lucas Antonio da Costa, Sub-Inspetór sira, Defensór Públiku-Jerál Sergio Sergio de Jesus Hornai, Xéfi Gabinete Ministru Justisa Evangelino Belo, Embaixadór Portugal (reprezentante), Amo Francisco Barreto, formadór sira, directores nacionais no municipios, xéfi departementu sira, família emposadu, assessor sira no mídia nasionál.

Maria de Lourdes Xavier Lin
Media Officer
Gabinete Ministru Justisa