VIZITA KORTEZIA MINISTRU IVO VALENTE IHA INSTITUISAUN TÚTELADU MINISTÉRIU JUSTISA NIAN IHA MUNISÍPIU COVALIMA

SUAI, MJ – S.E. Ministru Justisa Ivo Valente halo vizita kortezia ba iha instituisaun túteladu Ministériu Justisa nian mak hanesan; Terras no Propriedades, Rejistu Notariadu no Konservatóriu, Defensoria Públiku Munisípiu no Prizaun Suai iha Munisípiu Covalima foin dadaun ne’e, iha loron Kinta-Feira (13/04/2017).

Hafoin remata vizita kortezia, Ministru Ivo Valente kontinua halo reuniaun abertu ho funsionáriu Ministériu Justisa ne’ebé hala’o sira-nia kna’ar iha Minisípiu Covalima. Reuniaun abertu ne’e loke mós ba iha diálogu vise-versa, aliénde ne’e, Ministru Ivo Valente konvida funsionáriu sira-hotu, inkulindu ofisiais munisípiu atu kolabora ho prezensa ramu prizaun nian ne’ebé la kleur tán funsiona.

Iha diálogu ne’e, Diretór Terras no Propiedade no Rejistu Notariadu aprezenta dezafiu sira ne’ebé sira hasoru no alkansa ne’ebé sira atinzi ona. Oportunidade ne’e, sira mós partilha agradesimentu ba prezensa Ministru Ivo Valente atu buka hatene obstakulu no buka meius hodi rezolve. Kestaun sira ne’ebé mosu mak funsionáriu balun iha tinan barak sei kontratadu hela (seidauk sai permanente). Aliénde ne’e, informa mós kona-ba kondisaun edifísiu sira, tempu to’o ona atu halo rehabilitasaun. Sira mós aprezenta kona-ba fasilidades apoiu servisu nian, inklui transporte hodi háfasil liu servisu iha nível munisípiu, em relasaun ho peju servisu ne’ebé aumenta ba beibeik.

Ministru Ivo Valente iha diálogu ne’e agradese ba funsionáriu sira durante ne’e fó sira-nia apoiu, hodi nune’e bele ultrapassa servisu lubuk ida durante iha tinan 7 iha Ministériu Justisa. Nia expressa katak alkansu sira ne’e konta mós tanba servisu hamutuk ne’ebé di’ak tebes.

“Hela fulan hirak mai VI Governu sei remata, inklui mós ha’u-nia mandatu remata, nune’e ho oportunidade ida ne’e, aliénde atu konvida ita-bót sira hodi fó apoiu ba prezensa no funsionamentu Prizaun Suai, ha’u hakarak partilha ha’u-nia agradesimentu ba imi-hotu nia apoiu durante ne’e. Laiha prezente murak ida atu oferese ba imi, maibé iha momentu oportunu ne’e, ha’u hakarak atu halo reflesaun kiik ida ho ita-bót sira, hanesan umanu keta iha sala ruma favór perdua maibé ha’u husu atu ita-bót sira tenke fiar membru Governu foun mak sei mai, servisu ho profesionál no espíritu ás nafatin hodi dedika án,” agradese Ministru Ivo Valente.

Relasaun ho preokupasaun ne’ebé mak levantadu hosi funsionáriu sira, Ministru Ivo Valente husu atu pasiensia, no máximiza rekursu minimu hodi servisu nafatin no hein Estadu nia kbiit atu hakonu neneik, no nia promete atu tau iha relatóriu no rekomenda ba iha membru Governu foun mai.

Antes remata reuniaun, Ministru Ivo Valente konvida funsionáriu sira atu vizita Prizaun Suai no ajuda Diresaun Prizaun nian hodi hamós du’ut iha resintu prizaun nian, hodi prepara ba transferénsia sira dadur ka prizionéiru hosi Díli iha fim-de-mês Abril. Nia esplika katak, hamós du’ut parte ida atu manifesta apoiu malu, hanesan mós meius lasu amizade nian entre funsionáriu sira. Funsionáriu sira simu ideia ne’e, nune’e servisu hamós du’ut Prizaun Suai nian halo iha tuku 5:00 lokoraik depois de sai hosi servisu.

Maria de Lourdes Xavier Lin
Media Officer
Gabinete Ministru Justisa