DÍLI, DNSPRS – S.E. Ministru Justisa Ivo Valente partisipa iha selebrasaun aniversáriu Guarda Prizionál ba dala XVII hamutuk ho guarda prizionál iha área Estasionamentu Prizaun Becora, Díli, iha loron Tersa-Feira (02/05/17).

Partisipa iha selebrasaun aniversáriu ne’e, Ministériu Justisa konvida mós Diretora Ezekutivu Komisaun Funsaun Públika (CFP) Maria de Jesus Sarmento, reprezentante PNTL Carlos Jerónimo, ONG Asosiasaun HAK Jacob de Oliveira, UN Human Rights Unit Amelia de Araújo, PDHJ Filomena Dias, MSS-DNDS Silvia Veronica, CATL Jacinta Fuca, no Joaquim Smith.

Aniversáriu ba dala sanulu resin-hitu (XVII) iha loron 02 fulan-Maiu ba Guarda Prizionál marka mós ho serimónia entrega sertifikadu ba Guarda Prizionál ema nain-hat (4), ne’ebé demonstra ona sira-nia kontribuisaun, dedikasaun no prestasaun servisu ba iha establesimentu prizionál nian. Sertifikadu ba nain-hát, nu’udar agradesimentu Ministru Justisa Ivo Valente nian ba guarda sira ne’ebé halo nia kna’ar iha risku nia laran, maske nune’e, sira dedika nia án nafatin no dalabarak hetan baku hosi prizioneiru sira.

Iha ninia diskursu, Ministru Ivo Valente hateten, selebrasaun loron aniversáriu Guarda Prizionál dala sanulu resin-hitu, hatudu idade ne’ebé foin sa’e, otas foun ne’ebé presiza iha vontade dedika án, tuir nafatin formasaun atu nune’e servisu di’ak liután.

“Maske ita-bót sira sei hasoru rekursu ne’ebé limitadu no ekipamentu ne’ebé la sufisiente hodi apoiu servisu prizionál nian, maibé orgulho ba Guarda Prizionál, tanba bele hala’o servisu ho di’ak hodi atende prizioneiru iha Prizaun Becora no Gleno,” hateten Ministru Ivo Valente.

Ministru Ivo Valente hatutan katak, “Governu sei fó atensaun ba servisu Guarda Prizionál sira, liu hosi dezenvolvimentu rekursu umanos no kria kondisaun minimu ba guarda sira atu halo kna’ar iha prizaun.”

Ita presiza agradese ba ita-nia Estadu iha Planu Estratéjiku ida ba longo prazu ne’ebé mak ita haktuir pasu por pasu, ita iha Planu Estratéjiku Setór Justisa, liu hosi Diresaun Nasionál Servisu Prizionál em faze inísiu em relasaun ho estabelesimentu infra-estrutura no dezenvolvimentu rekursu umanos,” dehan Ministru Ivo Valente.

Ministru Ivo Valente ko’alia mós kona-ba rekrutamentu ba Guarda Prizionál Suai nian, prosesu ne’ebé la’o dadaun no númeru Timor-oan ne’ebé tuir hela prova eskrita liu ema 2,000 hodi kompete ba vaga guarda nian hamutuk 34 de’it, guarda foun sira sei destaka ba prizaun foun iha Suai. Ne’e hatudu, ema barak mak hakarak servisu nu’udar guarda prizionál, maibé sorte mak laiha maske partisipasaun ás tebes. Tanba-ne’e, Ministru Ivo Valente, husu atu Guarda Prizionál sira atu servisu didi’ak tuir tarefa mak hatu’ur ona, dedika án nafatin hodi servi povu no rai doben Timor-Leste.

Iha fatin hanesan, Diretór Diresaun Nasionál Servisu Prizionál no Reinsersaun Sosiál (DNSPRS) Helder Cosme Marçal Belo hato’o nia relatóriu kona-ba númeru guarda Guarda Prizionál Becora ho Gleno hamutuk ema-nain 181. Nia informa mós katak, durante ne’e guarda sira hetan formasaun; formasaun fíziku, mentál, formasaun tékniku profesionál, Lei Ezekusaun Penál, Kódigu Penál, jestaun emosaun, formasaun risku iha Yogyakarta, Indonésia, formasaun reinsersaun sosiál iha Portugal, formasaun karga traballu (beban kerja) iha Yogyakarta; no hetan mós formasaun husi Centro de Formação Jurídica no Judiciária (CFJJ), Secretária Estadu Mulheres, HNVG, NGO Pradet, PNTL, no IOM. Nia mós informa kona-ba esforsu dadaun hodi halo kooperasaun entre Ministériu Justisa, liu hosi DNSPRS ho Akademi Ilmu pemasyarakatan Jakarta, Indonésia.

Partisipa selebrasaun aniversáriu guarda prizionál ba dala XVII nian mak hanesan; Diretór DNSPRS Helder Cosme Marçal Belo, Inspetór GIA Ministériu Justisa Lucas António da Costa, Reprezentante Diretór Jeral Ministériu Justisa Alberto da Costa, Diretór DNDHC Flaviano Moniz Leão, Xéfi Departementu DNTPSC Gabriel Mendonça, reprezentante Diretóra CFJJ, Xéfi Departementu iha ámbitu DNSPRS, no funsionáriu hosi DNSPRS sira-hotu.

Maria de Lourdes Xavier Lin
Media Oficer
Gabinete Ministru Justisa