Ministeriu Justisa liu hosi DNDHC hala’o divulgasaun lei iha Postu Administrativu Laklubar

Versão para impressão

Laclubar – Ministériu Justisa (MJ) liu hosi Diresaun Nasional Direitus Umanus no Cidadania (DNDHC) hala’o divulgasaun lei durante loron ida iha Postu Administrativu Laklubar, iha loron, 24 Maiu 2017.
Iha sesaun abertura Diretur DNDHC hateten, “programa divulgasaun lei ne’e hala’o bazeia ba Planu Asaun Annual 2017 Ministeriu Justisa. Tinan tinan DNDHC hala’o programa divulgasaun lei iha nivel munisipiu no postu administrativu, iha nivel munisipiu iha Timor laran tomak realiza hotu ona divulgasaun no agora konsentra ba postu administrativu no suku sira, Iha Munisipiu Manatuto divulgasaun lei hala’o hotu ona iha postu administrativu, no hela postu administrativu Laklubar mak sedauk no ohin loron ita realize, divulgasaun lei ne’e ho objetivu atu hasa’e konesementu komunidade sira nia konaba lei hirak ne’ebé importante tamba ne’e mak ami sei fahe informasaun konaba Lei kontra violensia domestika, krime falsifikasaun dokumentus, krime eleitoral no prosedimentu hato’o keixa.
Iha fatin mak hanesan, Reprezenta Administrador Postu Laklubar, Fernando Valentin hateten, “ami agradese ba Ministeriu Justisa liu husi Diretur ho komitiva sira tamba bele mai iha Laklubar hodi divulga lei sira, ho nune’e ami nia komunidade bele hatene liu tan konaba lei sira hodi nune’e bele halo tuir buat ne’ebe lei bandu hanesan labele halo krime iha uma laran, labele falsifika dokumentus, labele halo aktu ne’ebe sai hanesan krime elitoral.”


Iha divulgasaun lei ne’e materia ne’ebé mak apresenta mak hanesan Lei kontra violensia domestika, krime falsifikasaun dokumentus, krime eleitoral no prosedimentu hato’o keixa, depois halo apresentasaun ba material sira, kontinua loke ba sesaun husu no hatan, iha sesaun ne’e komunidade sira ativu tebes hodi husu no hato’o sira nia preukupasaun ne’ebé sira infrenta, liu liu konaba violensia domestika no krime falsifikasaun dokumentus ne’ebe mak barak akontese iha sira nia komunidade. hamotuk ema nain 18 mak husu perguntas.

Partisipante ne’ebe prezensa iha divulgasaun lei ne’e hamutuk ema atus ida sanolu (110) kompostu hosi lideransa Postu Administrativu, Reprezentante Administrador ho membru sira, funsionariu sira hosi saude, CNE, STAE, Profesor, lideransa komunitaria sira hanesan Chefe Suku, Chefe Aldeia, Reprezentante Juventude feto no mane, lia nain inklui no komunidade sira.



Carmelindo da Silva Caetano
Tekniku Superior, DNDHC MJ