MINISTRU IVO VALENTE PREZIDE REUNIAUN KONSELLU KONSULTIVU MINISTÉRIU JUSTISA

Versão para impressão

DÍLI, MJ – S.E. Ministru Justisa Ivo Valente preside reuniaun Konsellu Konsultivu (KK) dala-haat nian iha fulan-Maiu, reuniaun ne’e hala’o iha sala reuniaun edifísiu foun Ministériu Justisa, Díli, iha loron Kuarta-Feira (31/05/17).

Mezmu seidauk halo inaugurasaun ba edifísiu foun ida ne’e, maibé oras ne’e dadaun Ministériu Justisa komesa uza ona edifísiu refere, Ministru Ivo Valente orgullu tanba bele uza ona edifisiu foun hodi hala’o servisu dadaun, no diresaun hotu-hotu hahú muda mai iha edifisiu foun. Tempu besik mai Ministru Justisa sei halo inaugurasaun ba edifísiu Ministériu Justisa foun ne’e molok mandatu remata.

Ajenda reuniaun ne’e atu hare’e hikas progresu servisu durante ne’e, rona mós dezafiu no planu servisu ba fulan-juñu; hanesan Diresaun Nasional Terras e Propriedade, e Sistema Cadastrais (DNTPSC), Diresaun Nasional Registu Notariadu (DNRN), diresaun ida ne’ebé bo’ot, ne’ebé foin lalais iha loron 5 fulan-Maiu halo ona lansamentu ba Passaporte Elektrónika Timor-Leste (PETL). Husi diresaun DNSPRS ne’ebé atinze ona progresu ida ne’ebé diak tebes, no foin lalais muda ona prizoneirus hamutuk ema nain-25 ba iha Prizaun Suai.

Reuniaun ne’e S.E. Ministru Justisa Ivo Valente mos fó tempu ba diretóris sira atu hato’o relatoriu durante fulan-Maiu nian laran. Husi Diretór DNTPSC hato’o katak, diresaun ne’e presiza tebes assessor hodi ajuda hare konaba problema disputa rai, liu-liu iha parte jurídika. Diretóra Centro Formação Jurídica e Judisiaria (CFJJ) mós hato’o relatóriu katak, durante ne’e formasaun la’o di’ak tebes, hosi 53 formandus sira ne’e só nain-ida maka laliu iha teste Lingua Português, mais hotu-hotu la’o ho diak.

Hosi parte Gabinete Inspesaun Auditoria, foin lalais halo ona graduasaun iha Medan, Indonesia kona-ba formasaun ne’ebé iha fulan kotuk liubá, tuir ona formasaun kona-ba Auditing, no formasaun ne’e hetan apoiu orsamentu husi Inspesaun Geral Estadu (IGE). Iha biban ne’e, Diretór DNSPRS Helder Cosme Marçal Belo, hato’o Obrigadu ba S.E. Ministru Justisa Ivo Valente ne’ebé fundamentalmente tun direta koalia ba Administrador Munisípiu Covalima, Suai, hodi hare rasik homatan no husu ajuda ba Administrador no Komandante PNTL Munisípiu Covalima nian hodi tau matan ba prizaun Suai ne’e.

Diresaun DNDHC mos relata katak, durante ne’e halo divulgasaun lei nian iha fatin haat (4) hanesan Bobonaro, Ainaro, Suai no Laclubar. Durante halo sosializasaun ba lei hirak ne’e la’o diak tebes. hosi Diretór diresaun DNAJL, Nelinho Vital mós relata preparasaun ba simeira COMJPLOP nian iha Brazilia, iha fulan-juñu tinan ida ne’e, durante ne’e Timor-Leste sai hanesan Prezidensia Ministru Justisa Paiz Lingua Portugês (CPLP), nune’e Timor-Leste mos atu entrega Prezidensia CPLP nian ba nasaun Brazil, ne’ebé oras ne’e simeira sei hala’o iha sidade Brazilia, Brazil. Diretór DNAJL mos relata konaba luta kontra trafiku umanu, liu-liu ba labarik, foin lalais ne’e aprezenta ba ONU iha Japaun, husi nasaun frazil sira mak hanesan Timor-Leste sai hanesan primeiru lugar iha performansia di’ak entre nasaun sira seluk.

Reuniaun ne’e mós koalia kona-ba ezekusaun orsamentu Ministériu Justisa, Diretór DNAF Crisogno da Costa Neto aprezenta pozisaun orsamentu ministériu, em relasaun ho ezekusaun atual no komitmentu áte fim-de-maiu 2017 ne’ebé hatudu di’ak tebes, ezekusaun programa no orsamentu liu ona 48%.

Partisipa iha reuniaun Konsellu Konsultivu (KK) ne’e mak hanesan; Diretór Jeral Henrique de Oliveira Ximenes, Sub-Inspetór Jaime Maia, reprezenta Diretór DNRN Suzana Fernandes, Diretór DNAF Crisogno da Costa Neto, Diretór PSIK Vicente Fernandes e Brito, subtitui Diretór DNDHC Francisco X. Vasco Soares, Diretór DNAJL Nelinho Vital, Diretóra CFJJ Marcelina Tilman da Silva, Diretór DNTPSC Romão Guterres, Defensór Públiku Jeral Sérgio de Jesus Hornai, Xéfi Departementu Finansas hosi Gabinete Diretór-Jerál, Assessora Mnistru Justisa Estela Amaral no Assessór Joaozito Viana.

Maria de Lourdes Xavier Lin
Media Officer
Gabinete Ministru Justisa