GLENO, MJ – S.E. Ministru Justisa Ivo Valente asina Nota Intendimentu ho Sekretáriu Estadu Polítika ba Formasaun Profesionál no Empregu (SEPFOPE) Elidio Ximenes da Costa kona-ba programa formasaun tezollu no konstrusaun posto tránsitu prizionál ba prizionéiru sira iha Prizaun Gleno, Munisípiu Ermera, loron Segunda-Feira (19/06/2017) foin lalais ne’e.

Iha serimónia asina Nota Intendimentu ne’e, fó mós apoiu ekipamentus ba Madres, no eskola iha Tokoluli Gleno, apoiu ekipamentus ne’ebé oferese hosi Komunidade Koreanu, liu husi SEPFOPE mak hanesan; mákina mikroskop, meza, kadeira, komputador no seluk-seluk tán. Antes ne’e mos Sekretáriu Estadu Polítika Formasaun Profesionál no Empregu (SEPFOPE) fó ona apoiu ba Prizaun Becora, inklui Gleno hanesan Televizaun, mákina kostura, ferros (estrika), hena, kábas, furadór no seluk-seluk tán.

Ministru Ivo Valente iha ninia intervensaun hateten katak, “asina Nota Intendimentu ho SEPFOPE ita hahú faze-foun tán, atu rekoñese dadur sira hodi funsiona Sentru Formasaun iha Estabelesimentu Prizionál sira; Prizaun Gleno, Díli no Suai. Aktu Nota Intendimentu ida ne’e atu loke dalan ba ita-bót sira atu kontribui buat bót liután, kontribui ho vontade aprende hodi hadia ita-bót sira-nia vida moris no nasaun kuandu livre ona hosi fatin rehabiltasaun ida ne’e.”

“Hodi implementa, Ministériu Justisa iha baze legál hodi hala’o, Lei Ezekusaun Penál fó oportunidade ba prizioneiru sira hodi halo servisu ruma hodi benefisia sira-nia família,” esplika Ministru Ivo Valente.

Ministru Ivo Valente mós esplika kona-ba efeitu hosi Lei Ezekusaun Penál ne’ebé fó oportunidade ba prizioneru selesionadu sira atu halo servisu balun iha liur ho akompañamentu hosi Guarda Prizionál, prosesu oinsá prizioneiru troka malu ba servisu iha liur, avaliasaun no komportamentu sira hodi fó dalan hodi hákuran tinan kastigu nian n’ebé Prezidente-Repúblika halo kada tinan, no esforsu Governu nian tuir Planu Estratéjiku Setór Justisa, oinsá polítika ba dezenvolvimetu prizionál iha Timor-Leste, inklui enkoraja prizioneiru sira atu kumpri lei no hadia án antes fila ba sosiedade.

Iha oportunidade ne’e Sekretáriu Estado Ilidio Ximenes da Costa mós ko’alia kona-ba kontéudu hosi Nota Intendimentu entre Ministériu Justisa no SEPFOPE.

“Nota Intendimentu ne’e foku ba formasaun área konstrusaun ninian, formasaun ne’e hodi tane ás ema nu’udar kriatura ida, tanba ema, sei laiha diskriminasaun entre ema sira iha liur ho imi-sira iha prizaun. Ita-bót sira mós iha direitu ba formasaun, tanba-ne’e, ha’u ho Sr. Ministru Ivo halo akordu ida fornese mákina tizollu ne’ebé sufisiente ona hodi produz rai-mean sai ba tizollu nune’e hodi uza ba konstrusaun, ida ne’e lai depois ita sei hakat ba oin,” esplika Sekretáriu Estadu Elidio Ximenes.

Sekretáriu Estadu Polítika Formasaun Profesionál no Empregu (SEPFOPE) Elidio Ximenes da Costa hatutan liu katak, “Governu bele troka, polítika bele troka, maibé hala’o planu ba Timor-oan la’o nafatin, atu nune’e iha kbi’it hodi loke servisu mesak no ba ema seluk.

Asina Nota Intendimentu ne’e ho ambiente kooperativu, nakonu ho ámizade no tau esperansa ba dezenvolvimentu perizaun nian, liu-liu ba formasaun ba prizioneiru sira iha Gleno, Munisípiu Ermera.

Akompaña Ministru Justisa Ivo Valente no Sekretáriu Estadu Polítika Formasaun Profesionál no Empregu (SEPFOPE) Elidio Ximenes da Costa mak hanesan; Diretór DNSPRS Helder Cosme Marçal Belo, Chefe Departementu, Diretór sira hosi SEPFOPE iha Gleno, Assessor Ministru Justisa Joaozito Viana, no ekipa hosi diresaun DNSPRS sira.