Macau - Iha loron 11 dezembro 2017, hola fatin iha Macau World Trade Centre, Ministra da Justiça Timor-Leste, Dra. Maria Ângela Carrascalão, hanesan konvidadu ònra hato’o diskursu abertura iha UNCITRAL-UM Joint Conference 2017 refere.
Iha nia diskursu, Sra. Ministra Carrascalão tatoli nia lia menon konaba harmonizasaun leis ou regulamentos iha area komersiu nian, tamba kestaun ida ne’e importante tebes ba mundo ida agora ne’ebe la iha ona fronteira ka mundu globalizasaun ne’e. Ho nune’e, asaun sira ba halo diskusaun hodi analiza konaba oin nusa atu iha lejislasaun ida ne’ebe bele fasilita mundu negosiu nian, sai hanesan asaun ida ne’ebe importante tebes.
Timor-Leste hanesan nasaun joven ida iha mundu, agora dadaun mos prepara hela an ho lejislasaun sira ba iha kestaun komersial mundu nian, liu-liu oin nusa atu prepara an nafatin hodi tama ba komunidade ASEAN nian. Tamba ho Timor-Leste nia istoria lejislasaun ne’ebe mai husi tempo Portuges, Indonesia, UNTAET no tempo independensia nian agora, hamosu difikuldade ida iha prosesu preparasaun lejislasaun sira ne’ebe relasiona ho direitu komersial nian.


Ho nune’e, tempo ida agora ne’e, oportunu tebes ba Timor-Leste atu buka hatene hanoin hodi bele manan matenek no esperiensia husi nasaun balun nomos matenek nain sira konaba direitu komersial internasional, atu nune’e bele fasilita mos Timor-Leste ba iha harmonizasaun lejislasaun nasional ho lejislasaun internasional ba komersiu nian.
Sra. Ministra hato’o mos nia agradesimentu ba UNCITRAL no Universidade Macau ne’ebe fó ona oportunidade hodi hola parte no halo abertura ba konferensia ida ne’e, inklui hato’o hanoin balun konaba pozisaun Timor-Leste nian.
Konferensia ida ne’e sei organiza durante loron 2 nia laran, ne’ebe koalia mos konaba relasaun komersial entre nasaun CPLP sira ho China. Parte ida ne’ebe importante tebes hodi implementa politika ba modernizasaun CPLP iha area komersiu nian, ne’ebe Timor-Leste intrudus wainhira lidera CPLP iha tinan 2015 liu ba.