Macau - Iha loron daruak Sra. Ministra da Justisa Timor-Leste, Dra. Maria Ângela Carrascalão, nia vizita trabalho iha Região Administrativa Especial de Macau (RAEM), 12 dezembro 2017, halo vizita ida ba iha Centro de Formação Jurídica e Judiciario (CFJJ)-Região Adsministrativa Especial de Macau (RAEM), hafoin remata enkontru kortezia ho Sekretaria para Administrasaun no Justisa-RAEM.
Delegasaun Ministra da Justisa nian, simu direitamente hosi Diretor CFJJ-RAEM Dr. Manuel Trigo.
Objetivu hosi vizita ida ne’e mak atu hametin liu tan kooperasaun juridika, liu-liu iha parte reforsa kapasidade jurista sira nian, liu hosi formasaun iha CFJJ ne’e. Sra. Ministra Justisa hato’o nia agradesimentu ba CFJJ ne’ebé simu ona no fó formasaun ida ne’ebé adekuadu ba jurista Timor-oan sira. Hosi parte CFJJ, hato’o mós sentimentu orgulhu tamba bele hola parte hanesan parseiru importante ida ba dezenvolve setór justisa iha Timor-Leste nomós hato’o sira prontidaun atu kontinua fó formasaun ba jurista Timor-oan sira, ho razaun ida katak, entre Timor-Leste ho Macau iha relasaun historiku, relasaun cultural ne’ebé koalia lian Portugúes iha parte justisa nian nomós nasaun rua ne’ebé aplika mós sistema bilingue iha sistema justisa nian.
Hosi vizita ida ne’e, hatudu katak, hosi parte CFJJ Macau hato’o mós sira nia disponibilidade atu halo mós formasaun juridika iha Timor-Leste. Hatan ba ida ne’e, Sra. Ministra Justisa simu ho laran luak ba CFJJ Macau nia pozisaun.
Akompanha Sra. Ministra da Justisa iha vizita ida ne’e maka Diretor DNAJL, Dr. Nelinho Vital no Representante Timor-Leste nian ba FORUM MACAU, Dr. Danilo Henrique.