Ministériu Justisa hala’o Diskusaun Meja Redonda hodi Rekolla Informasaun ba Relatoriu Inisial Estadu Timor-Leste Kona-ba Paktu Internasional Direitu Sivil no Politika

Dili - Ministériu Justisa (MJ) liuhosi Diresaun Nasional Direitus Umanus no Cidadania (DNDHC) realiza diskusaun meja redonda hodi rekolla informasaun ba relatoriu inisial Estadu Timor-Leste kona-ba Paktu Internasional Direitu Sivil Politika, iha Suai Room, Timor Plaza, loron 8 Febereiru 2018.
Diskusaun meja redonda ne’e mak atu rekolla informasaun hodi kompleta relatoriu inisial Paktu Internasional Direitu Sivil no Politika (PIDSP), iha oportunidade ne’e mós reforsa diskusaun entre instituisaun estadu sira no autor relevante sira seluk hodi responde dezafiu sira ne’ebé mak sidadaun sira enfrenta bainhira ezerse direitu sivil no politiku.
Iha abertura Vice Ministru Justisa, Sebastião Dias Ximenes, hateten, “objetivu prinsipal meja redonda ida ne’e atu rekolla informasaun ba paktu internasional direitu sivil no politika ho ezemplu kazu konkretus, relatoriu ida ne’e tarde oituan maske nune’e estadu esforsu nafatin atu halo tuir nia obrigasaun.”
“orgulhu ida ba Timor-Leste ninia situasaun di’ak ba area direitu sivil no politku tanba livre hosi pena morte no pena perpetua no iha buat balun vantazen no desvantazen ita rekolla para kompleta relatoriu hodi relata ba komite no di’ak ba ita nia konfiansa ba malu hodi servisu hamutuk,” dehan Sra Anjet Lanting husi UADU.
Diskusaun fasilita direita hosi Diretór DNDHC, Flaviano Moniz Leão no membru Asesoria Direitus Humanus Nasoens Unidas, Teresa dos Santos. Prosesu diskusaun foka ba area tematika 5 mak hanesan 1. Liberdade hosi Diskriminasaun, 2. Leberdade Relijiaun, 3. Liberdade Espresaun, Asosiasaun no Asembleia ho Paz, 4. Justisa no 5. Kona-ba Siguransa. Antes diskusaun iha aprezentasaun badak hosi instituisaun ka fontes sira. Sai hanesan aprezentador sira mak hanesan husi grupu LGBT no ADTL (Asosiasaun Difisiensia Timor-Leste), grupu Relijioza Musulmanu no Protestante, grupu Asosiasaun Jurnalista Timor-Leste no HAK, tuir mai hosi JSMP. Iha diskusaun ne’e mós iha intervensaun hosi Sekretariu Estadu Konsellu Ministru no Komunikasaun Sosial, Matias Boavida, Ajuntu Prokurador Jeral Repúblika, Zelia Trindade, Defensor Públiku Jeral, Sergio Hornai, Seksaun Justisa PNTL, F-FDTL no PDHJ.
Sorumutu ida ne’e hala’o iha loron ida tomak, iha parte enseramentu Diretór Jeral Ministériu Justisa, Henrique de Oliveira Ximenes, hateten “Ministériu Justisa agradese ba ita boot sira nia disponibilidade. Ita bo’ot sira sai autor prinsipal hodi fo informasaun ne’ebé apropriadu no kredivel, nune’e kompleta relatoriu inisial Paktu Internasional Direitu Sivil no Politika, ne’e ita hotu nia responsabilidade hotu.”
Partisipante ba eventu ida ne’e mai husi entidade sira refere ho nia membru sira hanesan LGBT, ADTL, HAK, JSMP, AATL, PNTL, F-FDTL, Sekretariu Estadu Komunikasaun Sosial, Ajuntu Prokurador Jeral Republika, Defensor Publiku Jeral, Prezidente Konsellu Imprensa no ekipa organizador sira hosi Ministériu Justisa no servisu hamutuk ho Nasoens Unidas.(c)

Carmelindo da Silva Caetano
Tekniku Superior, DNDHC MJ