SETP Marka Enkontru ba Organigrama DNTPSC

DÍLI -Sekretáriu Estadu Terras Proriedades (SETP) ba VIII Governo, Mario Ximenes iha loron 4 fulan-Jullu 2018 foin lalais ne’e marka enkontru ba daruak ho kargu Xefia sira hodi ko’alia kona-bá organigrama DNTPSC nian.
Iha biban ne’e Mario Ximenes hateten, diskusaun ba futuru instituisaun nian, liu-liu futuru Diresaun Nasionál Terras Propriedades iha Sekretáriadu Estadu Terras Propriedades (SETP), tanba ne’e sai hanesan polítika dahuluk Ministru Justisa ho SETP nian.

Iha enkontru ba daruak ne’e governante ne’e esplika mós, programa perioridade seluk mak Terras Propriedades ho Rejistu Notariadu tenki iha sira nia organigrama rasik tanba diresaun rua refere iha tempu badak sei sai hanesan diresaun jerál.
Membru governu ne’e salienta mós, hanesan diresaun tenki iha ninia organigrama rasik hodi bele koloka servisu tuir kompetensia nune’e mós tuir tarefa servisu nian mak dirsaun sira iha.
Nia mós sujere ba iha diretór, xefe departementu no tékniku diresaun nian atu bele deskute lalais organigrama diresaun nina, nune’e iha tempu badak bele lori-ba diskute iha ministériu.

SETP husu ba funsionáriu sira hotu liu-liu ba sira ne’ebé maka assume kargu iha diresaun hodi bele servisu ho haraik-an no iha responsabilidade ba servisu, tanba governasaun dawaluk nian ejise la’ós atu muda no troka funsionariu sira tuir hakarak, maibé tuir lei no mós ema idaidak nia profisaun hodi bele mellora di’ak-liutan futuru instituisaun nian.
Nia mós husu ba diretór ho tékniku sira iha diskusaun nia laran bele deskute mós kona-bá área importante balun hanesan jestaun ba utilizasaun rai hodi bele hatama mós iha organigrama.

Iha fatin hanesan Diretór Nasionál Terras Propriedades no Servisu Kadastrais (DNTPSC), Horacio da Silva hateten, nia parte pronto hodi halo diskusaun kona-ba organigrama diresaun nian ho nia tékniku sira inklui mós ho xefe departamentu sira.*

Anaias Babo Horta
Relasaun Públika DNTPSC