Dili-MJ - Kuarta-Feira (25/07/2018) semana kotuk, Governu Konstitusional Dawalu, halo ona diskusaun no debate Programa Oitavu Governu Konstitusional nian, hafoin Ministru Reforma Legislasaun no Assuntu Parlamentar, Dr. Fidelis L. Magalhaes, submete programa ba iha Parlamentu Nasionál iha loron Sexta, 20 Jullu liuba.
Iha diskusaun ne'ebé hala'o durante loron tolu, Kuarta ate Sexta Feira (25-27/07/2018) ne'e, diskusaun lao diak tebes. Iha intervensaun oioin husi deputadu/as opozisaun sira, no hatama mós proposta rejeisaun ba Programa Governu Konstitusional Dawalu.

Maske nune'e, iha loron ikus ba diskusaun rezultadu votasaun ba proposta mosaun rejeisaun, husi bankada opozisaun rezultadu hetan votu, afavor 25, kontra 36, no absteinsaun 4. Ho rezultadu refere, proposta mosaun rejeisaun la pasa, no programa Governu automatikamente pasa ona, hodi fó kbit konstitusional ba Governu dawalu hodi serbisu.
Hafoin Programa VIII Governu Pasa, iha intervensaun S.E. Primeru Ministru, Taur Matan Ruak, kompromete sei asegrua mós opinoens sira husi membru parlamentu sira durante diskusaun programa.

" Hau hakarak asegura ba ita boot sira katak ba governsaun ida ne'e, hanoin sira ne'ebé iha, sei hetan konsiderasaun hotu, tanba ne'e mak durante ezekusaun Programa ne'e nian, ne'ebé agora PN aprova ona, ita sei buka nafatin bainhira iha razaun no posibilidade, solusaun ba komprimisu ne'ebé involve hotu-hotu, tantu iha nível politiku no nível organizasaun sira sosiedas sivil nian, tanba ita hakarak garante katak konstrusaun paiz nian ne'ebé ita hakarak no dejeza sempre hala'o ho partisipasaun sidadaun hotu-hotu nian, hosi promove mobilizasaun komunidade sira nian iha ekipa, ho esperitu pertense nian ida ne'ebé loloos."

Programa Governu nian ida ba Timor Oan hotu-hotu ba Timor-Leste ida ne'ebé Forte, Riku no Seguru!
Programa ida ba nasaun ida ne’ebé moderna, dezenvolvidu no prósperu! Primeiro Ministru hatutan.
Hafoin Programa Governu pasa, tuir lei iha tempu badak Governu Konstitusional Dawalu sei aprezenta mós OJE 2018 nian, hodi halo diskusaun, apresiasaun no hodi hetan aprovasaun husi Parlamentu Nasionál.

30 Jullu 2018