DÍLI-SETP: - Sekretáriu Estadu Terras Propriedades (SETP, Mario Ximenes, iha loron Kinta, 9 fulan-Agostu 2018 foin lalais ne’e realiza enkntru Entre ministeriál ho Vise Ministru ESTATAL no Sekretáriu Estadu Protesaun Sivíl no Seguransa (SEPCS) iha Sala reuniaun Gabinete SETP, Bebora, Díli.

Enkontru entre ministeriál mak organiza hosi SETP ne’e ho nia objetivu iha futuru bele kria servisu konjuntu entre ministeriál hodi bele halo levantamentu ba partimoniu no uma estadu sira mak iha teritóriu Timor-Leste.

Hanesan uma-na’in SETP, Mario Ximenes hateten, nia parte konvida Vise Ministru ESTATAL tanba haree ba estrutura irarkia iha nivel tereno, atu ko’alia no organiza lideransa komunitária sira hodi bele tau matan ba sasan estadu nian, ne’e kompetensia Ministériu Administrasaun ESTATAL nian.

Tanba ne’e, tuir SETP bainhira servisu levantamentu dadus rai nian liu-liu ba uma no sasan estadu nian sira presiza kolaborasaun no servisu hamutuk entre prezidente autoridade munisípiu, administradór postu nian inklui mós xefe suku, xefe aldeia no ema hirak mak iha influénsia kada báiro.

Nune’e mós konvida SEPCS ho nia intensaun oinsa mak atu bele proteje no asegura patrimoniu estadu, liu-liu hanesan rai estadu edifisiu estadu inklui mós sasan estadu nian sira.

Maibé, tuir SETP, antes ekipa konjuntu sira tuun ba baze hodi halo levantamentu dadus, tenki kria uluk enkontru ho autoridade lokál no lideransa komunitária sira, nune’e bele informa mós ba iha komunidade sira sobre asuntu mak iha relasaun hodi bele ba rejistu fila-fali patrimoniu estadu sira mak durante seidauk iha dadus.

Sekretariu Estadum Mario Ximenes hateten, informasaun mak iha futuru ekipa sira ba foti bele sai mós hanesan baze legál ida antes halo delegasaun kompetensia ba iha munisípiu sira.

Iha fatin hanesan Vise Ministru ESTATAL, Abilio José Caetano hateten nia parte apresia ho inisiativa SETP nian, tanba bele konvida sira hodi bele hola parte mós iha prosesu levantamentu dadus ba rai no patrimoniu estadu nian hirak mak durante ne’e maluk sira uza maibé la iha arendamentu ho estadu, nune’e mós presiza indentifika didi’ak se mak sai arrendatariu ba iha fatin sira iha sidade laran.

Kona-bá seguransa ba iha patrimoniu estadu nian sira, Sekretáriu Estadu Protesaun Sivíl no Seguransa, Alexandrino de Araújo hateten, parte seguransa pronto atu bele kopera hodi bele halo levantamentu konjuntu ba iha partimoniu estadu nian sira, nune’e mós parte PNTL ninan mós sei bele tutela hodi bele fó apoiu másimu bainhira atividade levantamentu nian la’o.

Tuir planu ekipa ne’e antes tuun ba baze hodi halo levantamentu sei halo despassu konjuntu entre ministeriál ne’ebé maka sei assina hosi Membru Governu Instituisaun tolu nian hanesan, Sekretáriu Estadu Terras Propriedades,Vise Ministru ESTATAL no Sekretáriu Estadu Protesaun Sivíl no Seguransa.*