SETP Realiza enkontru ho diretór sira durante loron 2 hodi deskute PAA

DÍLI-SETP: Sekretáriu Estadu Terras Propriedades Mario Ximenes iha loron 16-17 fulan-Agostu 2018, foin lalais ne’e realiza enkontru ho diretór sira munisípiu nian inklui diretór nasionál DNTPSC ho xefe Departementu sira ámbitu DNTPSC hodi deskute kona-bá Planu Asaun Annual (PAA) 2019 nian iha Bebora, Díli, Timor-Leste.
Iha enkontru ne’e nia hateten, nia parte hakarak tebes atu hasorumalu ho funsionariu sira hosi munisípiu, nune’e bele hala’o hamutuk servisu bele to’o rohan, tanba antes servisu ne’e atu to’o rohan presiza funsionáriu sira nia kontribuisaun.

“Ha’u nia pólitika servisu ba rai iha oituan, maibé kona-bá tékniku ha’u la iha, tanba ne’e ha’u la’ós mai atu julga funsionáriu sira nia pasadu, maibé mai atu hadia pasadu sira ne’ebé maka la di’ak no presiza atu hadi’aknune’e mós mai atu haree tuir buat ne’ebé maka funsionáriu sira senti, atu ita hotu hamutuk hodi bele hadi’a no ami mai atu servi, mai laos atu hatudu-an, tanba ha’u mós vitima ida hosi sistema birokrásia iha Ministériu Justisa,” hateten eis Diretór Notariadu ba iha funsionáriu sira.

Durante diskusan nia husu ba diretór sira hosi munisípiu inklui mós xefe departementu sira ámbitu SETP nian hodi bele haree no deskute didi’ak planu sira ba iha tinan 2019 nian, tanba ne’e presiza funsionáriu sira nia partisipasaun no mós seriedade hodi bele tuir to’o hotu, labele tuir sorin deit hafoin ikus mai mosu ideia oin-oin.

Membru governu ba governasaun dawaluk nian ne’e esklarese mós katak, bainhira iha frakeza ruma iha instituisaun, liu-liu ema idaidak nian, di’ak liu hamutuk hodi buka ninia solusaun.
Nia parte rekoñese mós katak, bainhira laiha funsionáriu servisu SETP nian la susesu, tanba presiza ema hotu nia hamutuk no ema hotu nia kontribusaiun mak bele lori instituisaun ne’e ba oin ho memoria ne’ebé di’ak no sai istória ida furak iha fututu.

“Ha’u kaer, Sr. Ministru nia diskururu, iha pontu rua mak importante, mak hanesan Atendementu públiku no prestasaun servisu, liu-liu iha Diresaun Nasionál Rejistu Notariadu (DNRN) no DNTPSC. Maske ha’u dirije DNRN ho duransaun tinan 1 ho balun de’it maibé la’o. Tanba ne’e ita tenki fó atendementu ne’ebé hanesan ba sidadaun hotu, ita labele haree ida di’ak liu no ida la di’ak. Ita la sente maibé dalaruma ema ida mai fo’er ne’e nia lia-fuan kro’at tebes, dalaruma mós bele fó ameasa ba ita nia kareira.” Tenik Mario.

Sekretáriu Estadu ne’e husu ba funsionáriu sira hodi hatudu prestasaun servisu ne’ebé di’ak, nune’e mós hanesan funsionáriu tenki tau pólitika ba kotuk hodi tau servisu ho profesionál mak iha oin, bainhira servisu ho profesionál responde mós sei di’ak iha loron ikus.

Iha fatin hanesan diretór DNTPSC, Horasio da Silva hato’o agradese ba iha prezensa no inisiativa SETP nian hodi bele realiza enkontru ho diretór munisípiu sira hotu, tanba ne’e nia husu ba funsionáriu sira atu bele partisipa halo di’ak hodi bele fó likus hanoin ruma mak di’ak ba iha PAA mak iha.

Iha diskusaun PAA durante loron rua ne’e kada diretór munisípiu hato’o mós sira nia planu hodi bele aumenta funsionáriu iha nivél munisípiu, konstrusaun moru DTPSC sira iha Munisípiu, no kapasitasaun iha area rekursu umanu liliu presiza kapasita funsionáriu sira iha área tékniku inklui administrasaun nian.

Durante diskusaun ba PAA nian, diretor sira inklui xefe departementu ámbitu SETP nian apresia ho planu SETP nian mak sei halo levantamentu ba rai ho uma estadu sira mak estabilese iha teritoriu Timor-Leste.

Diskusaun refere hetan partisipasaun hosi SETP, Xefe Gabinete SETP, Diretór Nasionál DNTPSC, Diretór DTPSC Munisípiu inklui mós Xefe Departementu no funsionáriu sira DNTPSC nian.*

Ananias Babo Horta
Ofisiál Relasaun Públika DNTPSC