Dili, MJ: Sexta feira (24/08/2018) loraik, Primeiru Ministru, Sr. Taur Matan Ruak fó posse ba Defensoria Publiku-Jeral (DPJ) foun Dr. Câncio Xavier, hodi substitui Defensor Publiku-Jeral sessante Dr. Sergio da Costa Hornai.

Antes ne'e iha fulan kotuk, Defensor Publiku-Jeral, Dr. Sergio da Costa Hornai, Prezide enkontru ida ho Ministru Justisa inkui mós ho Konsellu Superior Defensória Publiku-Jeral sira hodi rona opinoens membru konsellu sira nian ba nomeiasaun kandidatu Defensória Publiku-Jeral foun.

Nune'e bazeia ba enkontru, Defensoria Publiku-Jeral sessante ho Ministru Justisa, Dr. Manuel Cárceres da Costa nomós ho membru Konsellu Superior Defensoria Publika-Jeral iha loron 24 fulan Jullu liuba deside hodi nomeia lista kandidatura DPJ nain tolu ba Primeiru Ministru Taur Matan Ruak.

Primeiru Ministru deside hodi nomeia Dr. Câncio Xavier nu'udar Defensória Publiku-Jeral foun no sesta feira (24/08/2018) ne'e, simu posse iha Palasiu Governu Dili, hodi hala'o knar durante periodu 2018-2022.

Tuir lei Primeiru Ministru, mak nomeia Defensoria Publiku-Jeral, bazeia ba sub proposta husi Ministru Justisa nian.

Hafoin posse, ba Jornalista sira Defensor Publiku-Jeral foun sublinha katak " setor justisa laos atu halo deit juramentu maibe koalia kona-ba setor justisa, ita tenke koalia mós kona-ba infraestrutura atu bele f'ó espasu ba profesional justisa sira hodi serbisu no asegura segredu Profesional nian".

Dr. Câncio Xavier, hatutan tan katak " Defensoria Publiku ezisti atu fó assistensia jurídika no estra-judisiál ba povu ne'ebé mak laiha kbiit atu selu advogadu privadu", Nune'e nia nia espera kualquer governasaun, inklui Governu Konstitusional da-walu nafatin fó apoiu ba Defensoria Publiku nu'udar pilar prinsipal ida iha setor justisa, tanba programa sira ne'ebé governu trasa inklui sétor justisa ne'e hanesan fatór prinsipal atu bele apoiu ba sidadaun.

Entertantu Tuir dekretu lei No. 10 /2017, Defensor Publiku-Jeral sei asumi deit kargu durante tinan 4 no bele estende ba periodu ida deit, (hamutuk tinan 8), maibe tanba razaun inpasse politika, VII Governu liuhusi Ministra Justisa sessante iha tempu ne'eba estende ona mandatu DPJ ninia to'o formasaun VIII Governu Konstitusional.

Nune'e bainhira eleisaun antesipada hotu no iha ona governasaun foun, (Governu dawalu) automatikamente mandatu Defensor Publiku-Jeral, Dr. Sergio Hornai ninian mós remata ona.

Partisipa iha seremónia tomada de posse mak hanesan; Prezidente Tribunal Rekursu, Meritísimu Juíz Deolindo dos Santos, Ministru Justisa, Dr. Manuel Cárceres da Costa, Sekretáriu Estadu Terras & Propriedades, Sr. Mário Ximenes, Dignísimu Prokurador-Jeral Repúblika José da Costa Ximenes, Defensor Públiku-Jeral Sessante, Dr. Sergio da Costa Hornai nomós família Defensor Públiku-Jeral nomeadu.