MJ-CFP Vizita Prizaun Covalima

Ministériu Justisa (MJ), liu hosi Komisáriu ba Gabinete Inspesaun Auditória, Lucas Antonio da Costa hamutuk ho Prezidente Komisaun Funsaun Públika (CFP-Sigla Português) Faustino Cardoso Gomes hamutuk kargu xefia liña ministériais sira hotu iha loron 14 fulan Juñu 2019 foin lalais ne’e, hala’o vizita ba prizaun Covalima.
Iha serimonia vizita prizaun ne’e, Prezidenti Komisaun Organizadora ba komemorasaun loron CFP nian, Lucas Antonio da Costa hato’o agradesimentu ba Prezidenti CFP inklui mós funsionáriu no kargu Xefia sira hosi instituisaun estadu nian sira seluk ne’ebé maka partisipa iha vizita ba prizaun.

Iha vizita ne’ebé hala’o durante loron ida ne’e Prezidente Komisaun Funsaun Públika KFP, Faustino Cardoso Gomes iha nia intervensaun hateten, nu’udar  funsionáriu no servidór sai atan  ba povu tuir nesesidade no la’os hatudu-an hanesan liurai boot.
Tanba ne’e tuir Faustino, ho vizita kortezia ne’e atu halo reflesaun ba funsionáriu públiku hotu atu mellora servisu hodi hatan ba espetativa povu nian iha setór infraestrura, edukasaun, Saúde, agrikultura inklui setór importante seluk nune’e mehi libertasaun povu sai realidade iha periodu ukun-an.
Tuir prezidente KFP vizita ne’e mós atu ekoraza prizioneiru sira hodi hatudu komportamentu di’ak no halo reflesaun nune’e, bainhira reintegra ba fali komunidade sai sidadaun di’ak ba  familia  no komunidade.

Iha fatin hanesan Diretór Estabilesimentu Prizional ba prizaun Suai nain, Julio Dias Ximenes hato’o mós ninia preokupasaun sira kona-bá moru prizaun nian ne’ebé maka oras ne’e ho kondisaun ameasadu atu monu, inklui mós PNTL tenki tau ninia postu permanente ida iha areadores prizaun suai nian, no tenki konstrui moru externa iha prizaun refere, hodi bele asegura di’ak liutan dadur sira, nune’e mós tenki tau-matan mós ba alimentsaun dadur sira nian.

Iha vizita kortezia ba estabelesimentu prizaun Suai iha ámbitu komemorasaun loron Nasional Funsaun Públika ho tema “Impulciona o valor de Rehabilitaçaõ Social dos Reclusos Junto a Familias e Comunidade no Futuro” iha Munisipiu Covalima ne’e hahú ho missa agradesimentu ne’ebé diriji husi Padre parokia Ave Maria Suai, Pe. Sebastião Noronha.

Missa agradesimentu ne’ebé hala’o iha kapela São Miguel Arcanjo prizaun Suai ne’e hetan Partisipasaun hosi kargu xefia liñas ministeriais,  Administradór interinu ne’ebé hanesan Sekretáriu munisípiu Covalima, Komandante Polisia Covalima
Hafoin missa, Prezidente KFP akompaña husi Diretor prizaun estabelesimentu Suai, Julião Dias Ximenes akompaña mós husi kargu diresaun xefia hala’o vizita ba prisioneiru sira iha bloku tolu, kompostu bloku A ema nain 16 Bloku B ema nain 18 no Bolku C ema nain 15 ho total prisioneiru ema nain 49 ho kategoria kazu krimi ne’ebé maioria komete kazu violasaun seksual no dadur hirak ne’e hosi munisípiu Covalima nain 28, Ainaro nain 11 Manufahi nain 5 no Bobonaro nain 5, no sira nain 49 ne’e proteze hosi guarda nain 41.*

Ananias Babo Horta
Relasaun Públika DNTPSC