Ministériu Justisa (MJ) liu husi Diresaun Nasional Direitus Umanus no Cidadania (DNDHC) halao formasaun Direitus umanus durante loron rua ba autoridade lokal sira iha Postu Administrativu Atabae, Munisipiu Bobonaro, iha loron, 02 Ate 03- 07- 2019, nomos hala’o iha posto Administrativu Bazartete Munisipiu Liquica hahu iha dia 16 ate 17- 07- 2019.
Iha abertura ne’e Xefe Departamentu Tratadu Monitorizasaun Sr. Miguel Malibere Fernandes ne’ebé representa Diretór DNDHC hateten katak “Programa formasaun direitus umanus ne’e hala’o bazeia ba Planu Asaun Annual Ministeriu Justisa nian tinan 2019 hala’o programa formasaun direitus umanus iha nivel Munisipiu no Postu Administrativu, no iha tinan ida ne’e Postu administrativu Atabae sai hanesan fatin primeiru hodi hala’o formasaun Direitus Umanus, objetivu prinsipal husi formasaun ne’e atu hasa’e kuñesimentu autoridade lokal sira konaba importansia husi direitus umanus ho nune’e sira bele implemeta iha sira nia moris loron-loron. Nomos núdar sidadaun ne’ebé moris iha estadu de direitu demokratiku iha obrigasaun atu hatene saida mak direitu no dever nudar sidadaun ne’ebe di’ak.

Formasaun Direitus Humanus ba loron rua tomak ne’e loke formalmente husi Reprezentante Administrador Postu Administrativu Atabae, Sr. Lino Tavares iha ninia abertura hatete, katak hau apresia tebes ba ekipa Ministeriu Justisa ne’ebe hodi halao formasaun durante loron rua iha postu Administrativu Atabae ne’e importante tebes mai ami lider lokal sira no komunidade sira iha area rural ne’ebé do’ok husi kapital atu bele hatene lalaok kona ka saida mak direitus humanus. Nomos nudar Sidadaun ida atu bele hatene hau nia direitu no Dever nudar moris iha estadu de de direito demokratiku nia laran. Apresiasaun kuaze atu hanesan mos hato o husi Reprezentante Postu administrative Bazartete, Sr. Amaro Pereira.

Subtansia materia prinsipal ne’ebé iha Formasaun Direitus Humanus nee mak hanesan, Prinsipíu no Valór Direitus Humanus no Lei Politika Uja Forsa hato’o husi Tekniku Superior, Sr Celito Cardoso, Kovensaun kona ba Eliminasaun Diskriminasaun ho Forma oi-oin Kontra Feto no Lei Kontra Violensia Domestika, hato’o husi Xefi Departamentu tratadu Monitoruizasaun Sr. Miguel Malibere Fernandes, Konvensaun Internasional kona ba Direitu Labarik, hato’o husi Xefi Departamentu Administrasaun Sra. Julberta Soares.
Formasaun direitus umanus durante loron rua ne’e hala’o ho modelu aprezentasaun, husu no hatan inklui halo grupu diskusaun nomos. kolaborasaun husi sr. Jose Mota no Sra Manuela do Rojario Araujo, hodi Fasilita pergunta ne’ebé mai husi partisipante sira. Ba prosesu lalaok sesaun tuir ajenda fasilita hosi MC. Sr. Jose Mota.

Enkuantu remata formasaun, partisipante sira iha postu rua ne’e simu sertifikadu ne’ebé prepara husi Ministeriu Justisa, Iha sesaun entrega sertifikadu ne’e asiste husi Reprezentante Administrador Postu, no Komandante Eskuadra PNTL. Formasaun ne’e Partisipa hosi autoridade lokal sira mak hanesan Chefe Suco no Aldeia, lider komunitaria, Professores sira, membru PNTL, Juventude, Lia Nain, parte Igreja, Funsiunariu publiku no Mediku sira, ne’ebé partisipante ba sesaun rua ne’e hamutuk 80, Formasaun ne’e interaktivu tebes tamba partisipante sira ativu hodi husu perguntas.**