Loron Terça feira, 10 fulan setembro 2019 - Ministério da justiça liu husi Direção Geral de Administração da Política e Justiça ho Direção Geral dos Serviços de Registos e Notariado hala’o enkontru tekniku ho Diretor MRLAP, UNDP no UNICEF, hodi koalia kona-ba estudu atu estabelese ID uniku.

Enkontru ne’ebe hala’o iha sala auditoria prinsipal Ministério da Justiça, prezidi husi Diretora Geral DGAPJ.

Diretor husi MRLAP, Sr. Fausto Maia, iha nia intervensaun hateten katak “Reforma Legislativu hare katak presiza intervensaun husi linhas Ministeriais ho kordenasaun nebe solido, tanba ne’e maka Ministério MRLAP hola inisiativu kolabora ho UNDP,UNICEF nomos ho Ministério da Justiça,tanba hare katak sei iha inisiativu ne’e lao karik ita presiza implementador ida mak DGSRN, ita mos presiza lei kabe ba assuntu ida ne’e nian, lei prinsipal ita hare katak lei registo sivil nian.

Tuir fali maka lei sira ne’ebe liga ho informátika ho Teknolojia nian “ Cyber Security “ nian lei assesu ba informasaun protesaun ba dadus do governu sira ne’e importante teb-tebes.

Husi parte Ministério da Justiça, Diretora Geral DGAPJ, Dra. Marcelina Tilman, hateten katak “ami mos rona ona informasaun husi ita boot sira ami hanoin inisiativa sira ne’e diak, husi parte tékniku apoiu hodi implementa desizaun politika husi Governo nian. Kestaun mak lideransa sira mak foti ona desizaun no inisiativa ne’ebe diak hodi bele istimula ita nia nesesidade no ohin mos ami rona katak ne’e identidade uniku hanoin ne’e diak, karik tempu iha ona inisiativa para atu bele implementa entaun iha futuru ita sei estabelese projetu ida.

Diretor Geral ba Direção Geral dos Serviços de Registos e Notariado, Crisogno Neto, hato’o, katak prosesu sira la’o tiha ona no dokumentu akordu planu inisiasaun konjuntu – Pré-Projetu Identifikasaun Uniku/PIK-IDU (Agreement on Joint Initiation Plan on Unique ID pré-Project, ne’e kuaze Ministériu relevante sira ho Instituisoens envolvida sira assina tiha ona hela Ministério da Justiça maka seidauk asina, no hau mos akompaña hela prosesu sira ne’e.

Diretor DNRN Sr. João Martins Borges, aprejenta ona dokumentu refere ba Exa Ministro da Justiça iha encontro Konsellu Konsultivu Ministério da Justiça nian semana hirak liuba, no dokumentu ne’e agora dadaun iha ona Gabinete Sua Exa Ministro da Justiça nian meza.

Agora oin sa aprosimasaun husi equipa teknika nian ba Sua Exa Ministro da Justisa hodi bele konvense nune’e bele asina dokumentu refere. Tamba projetu refere tenke banati ba politika no planu estratejiku desenvolvimentu nebe iha. Sugere, atu equipa ne, bele halo audiensia ho Sua Exa Ministro da Justisa hodi esplika lalaok projetu refere. Nune’e, Sua Exa Ministru da Justisa bele konvensidu no assina dokumentu refere. Iha parte seluk mos rekomenda ba equipa refere, atu hato’o ba membro governo responsavel atu apresenta dokumentu refere ba Konsellu Ministru hodi halo apresiasaun no foti desizaun, molok implementa.