SEKRETÁRIU Estadu Terras Propriedades (SETP) Mario Ximenes iha loron 13 fulan-Jullu 2020 hala’o enkontru urjente ho Vise Ministra Turizmu Komuitária no Kultura, Sekretáriu Estadu Arte no Kultura inklui Sekretáriu Estadu Juventude no Desportu hodi deskute kona-bá fatin arte moris nian.
Iha enkontru ne’ebé hala’o urjente iha gabinete Sekretáriu Estadu Arte no Kultura ne’e, SETP hateten, nia parte enkontru ona ho instituisaun relevante sira hodi deside fatin ba joven kreativu sira ne’ebé mak durante ne’e espresa sira nia talentu iha arte moris.
“Ami hala’o ona enkontru hodi deside fatin ba joven sira ne’ebé durante ne’e espresa hela sira nia talentu iha arte moris, tanba iha tempu badak fatin ne’ebé oras ne’e utiliza hosi arte moris ne’e tenki hamamuk hodi entrega ba parte veteranu sira,” Mario Ximenes.

Membru VIII governu ne’e salienta mós, fatin ne’ebé hamutuk hodi deside ba arte moris nian iha futuru mak armajén MTCI nian ne’ebé lokaliza iha Fomento.
Fatin ne’ebé dadaun ne’e utiliza hosi artemoris, Governu liuhosi Primeiru Ministru (PM) deside ona hodi entrega ba Veteranu sira. Tanba ne’e, nia parte marka enkontru ho V-MTCC, SEAC, no SEJD deside fatin besik armajén MTCI nian iha Bebora hodi muda joven kreativu sira ba iha fatin refere. Dehan SETP.

Iha fatin hanesan Vice-Ministra do Turismo Comunitário e Cultura, Inácia da Conceição Teixeira hateten, joven kreativu sira ne’e importante tebes hodi bele dezenvolve sira nia talentu, tanba ne’e ministériu relevante sira buka meius oinsá mak atu bele tau sira iha fatin ida.*