SEKRETÁRIU Estadu Terras Propriedades (SETP) Mario Ximenes iha loron 14 fulan-Agostu 2020 foin lalais ne’e liuhosi Diretór Jeral Terras Propriedades (DGTP) assina Termo entrega servisu em subtituisaun ho durasaun fulan-6 ba kargu diretores ho kargu xefia ne’ebé iha mudansa hodi hein selesaun por méritu.
Husu ba kargu xefia sira atu bele la’o tuir kargu ne’ebé mak diretores no xefe departamentu sira hetan, nune’e bele hala’o servisu tuir idaidak ninia funsaun. Kargu xefia ne’ebé hetan la’ós ema ida nian maibé ne’e ema hotu nian. Atu hetan konfiansa sira ne’e buat hotu depende ba hahalok no servisu nundár servidór estadu nian hodi bele fó atendimentu ne’ebé di’ak ba komunidade sira.
Antes assina termo entrega, SETP hateten, polítika VIII governu nian, liu-liu Ministériu Justisa nian la’ós atu hasai ka hatun ema ida hosi nia kargu maibé atu halo mudansa ba servisu.

“Ha’u ho señór Ministru Justisa mai iha ne’e kompremetidu katak, ami sei la hatún no sei la hasai ema arbiru. Ita so halo mudansa, hanesan hosi fatin id aba fatin seluk, maibé nafatin ho kargu ne’ebé iha,” dehan Ximenes.
Iha fatin Sekretáriu Estadu ne’e hateten, nia parte respeitu tebes birokrátiku, tanba ne’e ninia despassu la ba direta iha diretór Nasionál sira maibé ba hotu iha Diretór Jerál, hafoin iha Gabinete Diretór Jerál fó-sai ba diretór nasionál sira.

Nia subliña mós dirijente diresaun nian tenki fó atensaun másimu ba iha atendimentu públiku liu-liu ba sidadaun hotu ho hanesan, nune’e labele hamosu dezentendimentu iha Terras Propriedades.
Iha fatin hanesan Diretór Jerál Terras Propriedades Rodrigo de Mendonça hateten, Diresaun Jerál Terras Propriedades hahú hosi tinan 2019 to’o 2020 ne’e kargu xefia sira interinu mak barak, tanba xefe departamentu sira balu ba assume kargu hanesan Diretór Jerál no Diretór Nasionál.
Nia hateten, tuir lei Funsaun Públiku assume kargu interinu ninia durasaun to’o fulan neen, maibé Terras Propriedades ninia kargu xefia internu sira to’o tinan ida.
Hanesan Diretór Jerál, Rodrigo mós husu ba diretór munisípiu sira ne’ebé mak assume kargu tenki ho responsabilidade hodi bele halo atendimentu ne’ebé di’ak ba komunidade sira.

Iha assina termo entrega kargu em substituisaun ba diretores munisipais nain 12 no kargu Xefia nain 10 iha ámbitu Diresaun Jerál Terras Propriedades ne’e hetan partisipasaun hosi Sekretáriu Estadu Terras Propriedades (SETP) Diretór Jeral Terras Propriedades (DGTP), Diretores Nasionais, Diretores Munisípais inklui mós Xefe Departamentu sira.*